Táýelsizdiktiń 25 jyldyǵyna oraı Almaty oblysynda jańa shaǵyn GES ashyldy. Sarqan aýdanynyń Lepsi ózeninde qýattylyǵy 17 MVt bolatyn shaǵyn GES-2 iske qosyldy. Jańa nysannyń saltanatty ashylýyna oblys ákimi Amandyq Batalov qatysty, dep habarlady Almaty oblysy ákiminiń baspasóz qyzmeti.
Nysannyń ashylýynda A. Batalov Qazaqstandaǵy taý sýlarynyń gıdroenergetıkalyq qorynyń 65% Almaty oblysynda ekenin tilge tıek etip, oblysta sý jáne jel energetıkasyn damytýdyń arnaıy baǵdarlamasy ázirlengenin, sonyń aıasynda jańa GES ashylyp otyrǵanyn atap ótti.
«Osy GES-ti iske qosýdyń nátıjesinde óńirdegi elektr eneregııasynyń tapshylyǵy saǵatyna 68 mln kVt-qa azaıdy. Bul óte mańyzdy jetistik, degenmen meje emes. Qazirgi kezde Qora ózeninde qýattylyǵy 26-29 MVt-qa deıingi taǵy 3 GES-tiń qurylysy júrip jatyr. Oǵan qosa taǵy birneshe nysannyń qurylysy josparlanǵan. Munyń barlyǵy ózimiz óndiretin elektr energııasynyń tapshylyǵyn azaıtyp, oblystyń elektr qýaty úshin syrtqa táýeldi bolmaýyna jáne jańartylǵan energııa kózderin damytýǵa yqpal etpek. Sonymen qatar, kompanııalar josparlap salǵan GES-tar EKSPO kórmesindegi «Qazaqstan» pavılonynan kórnekti oryn alatyn bolady», – dedi oblys ákimi.
Aıta keteıik, Sarqan aýdany Lepsi ózenindegi shaǵyn GES-2 jylyna orta eseppen 67,78 mln kVt/saǵ. elektr energııasyn óndiredi. Qurylystyń smetalyq quny – 4,2 mlrd. teńge. Qurylys jumystary 2014 jyldyń tamyz aıynda bastalǵan. Jańa nysan iske qosylǵannan keıin 17 adam turaqty jumyspen qamtyldy.