Mınskide (Belarýs) «elektrondy úkimetti» damytý máseleleri boıynsha sarapshylar forýmynda Astanadaǵy memlekettik qyzmet salasyndaǵy О́ńirlik hab basqarý komıteti tóraǵasy Alıhan Baımenov memlekettik qyzmetti modernızasııalaý men memlekettik basqarýdy damytýdaǵy ǵalamdyq jáne aımaqtyq trendtermen tanystyrdy. Forýmdy Belarýs Respýblıkasy úkimeti men BUU Damý Baǵdarlamasy uıymdastyrdy.
Forýmǵa Belarýs prezıdent ákimshiligi ókilderi men úkimet músheleri, «elektrondy úkimet» salasyndaǵy halyqaralyq sarapshylar men aqparattyq tehnologııalar salasyndaǵy jetekshi álemdik kompanııalar mamandary qatysty.
Alıhan Baımenov óz sózinde XIX ǵasyrdaǵy zańgerlerdiń biriniń: «zańdar óskeleń adamnyń kıimi tárizdi bolýy kerek. Ol adamǵa qyzmet etetindeı pishilýi tıis – ósýin shektemeýi qajet» degen naqylyn eske saldy. Memlekettik qyzmetti modernızasııalaýdyń tórt ózara baılanysty baǵyttarynyń alǵashqysyn baıandamashy «zamanaýı, ýaqyt tezine jaýap beretin, damýǵa jaǵdaı jasaıtyn zańnama bolýy tıis» dep atap kórsetti. «Ekinshisi - memlekettiń tıimdiligi úshin ǵylym men tehnologııalar jetistikterin paıdalanýǵa múmkindik beretin ınnovasııalar. Úshinshisi - memlekettik qyzmetti búgingi kún talabyna saı, ózgeristerdi basqaryp, olarǵa ıkemdele alatyn kadrlarmen tolyqtyrý. Tórtinshisi – orta (ınfraqurylym, mádenıet)», - dedi Alıhan Baımenov. Sonymen birge ol memlekettik qyzmetti modernızasııalaý memlekettik qyzmet sapasyn kóterý úshin kerektigin, bul óz kezeginde memlekettik qyzmet úderisterin azamattar úshin qarapaıymdatyp, olardyń senimin arttyrýǵa ákelýi tıistigin aıtty.
Forým barysynda memlekettik basqarý sheshimderi tıimdiligin jetildirýde ınnovasııalyq tehnologııalardy qoldaný, sıfrlyq transformasııanyń ár túrli qoǵamdyq qatynastar men ekonomıka sektorlaryndaǵy erekshelikteri sóz bolyp, Izraıl men Estonııa úlgisinde aqparattyq júıelerdi engizý tájirıbeleri talqyǵa salyndy. Qatysýshylar memlekettik basqarý, áleýmettik sala jáne ekonomıka salalalarynda zamanaýı aqparattyq tehnologııalardy qoldanýdyń ózekti máseleleri boıynsha oı bólisti.