Pavlodarda shahmattan ótken halyqaralyq týrnırdiń jeńimpazdary anyqtaldy. Jarys qorytyndysy boıynsha belgııalyq grossmeıster Vadım Malahatko top jardy, dep habarlaıdy pavlodarnews.kz.
Pavlodar qalasynda osymen 11-shi márte jalaýyn jelbiretken jarysqa álemniń toǵyz elinen 100-ge jýyq sportshy qatysty.
Jarysta Qazaqstannyń túkpir-túkpirinen sonymen qatar, Ýkraına, Reseı, О́zbekstan, Qyrǵyzstan, Belarýs, Ázirbaıjan, Belgııa, Túrkııa, Mońǵolııa jáne Serbııa elderiniń kil myqtylary baq synady. Osy jyldyń basty ereksheligi - týrnırde 13 grossmeısterdiń óner kórsetýinde.
Týrnır qorytyndysy boıynsha Belarýs elinen kelgen shahmatshy Kırıll Stýpak kúmis medalǵa qol jetkizse, Reseıdiń Altaı ólkesinen kelgen Vıtalıı Boıarınsev týrnırdiń qola júldegeri atandy. Oraldyq 18 jastaǵy oıynshy Janat Saın az ǵana upaı aıyrmasymen úzdik úshtiktiń qataryna kire almady. Buǵan deıin halyqaralyq dárejedegi sport sheberi jáne mektep oqýshylary arasyndaǵy álem chempıony belesterin baǵyndyrǵan ol osy týrnırde tórtinshi oryndy qanaǵat tutty.
« Týrnırdiń taǵy bir erekshe tusy qatysýshylardyń halyqaralyq sport dárejelerine qol jetkizýinde boldy. Máselen, byltyr qazaqstandyq Mádına Dáýletova áıelder arasyndaǵy halyqaralyq grossmeıster ataǵyn alǵan bolatyn. Bıyl pavlodarlyq Álisher Súleımenov halyqaralyq sport sheberi úmitkerliginiń upaıyn jınady. Shahmat týrnırine Shahmardan Esenov atyndaǵy ǵylymı-bilim berý qory, QR Mádenıet jáne sport mınıstrliginiń sport komıteti jáne Qazaqstan Respýblıkasynyń Shahmat federasııasy qarjylaı qoldaý kórsetti», - deıdi «Shahmat úıiniń» dırektory Shárip Qashkenov.