Búgin Taldyqorǵanda 16 qabatty qonaq úı paıdalanýǵa berildi. El Táýelsizdiginiń 25 jyldyǵy qarsańynda ashylǵan keshen qalanyń ońtústik-batys aýdanynda boı kóterdi, dep habarlady QazAqparat.
Qonaq úı qurylysy byltyr kóktemde bastalǵan. «Kóktem Grand» atty keshen jeke ınvestordyń qarjysyna salynyp, munda qonaq úı jáne bıznes ortalyq qyzmeti qatar usynylady.
«Táýelsizdiktiń 25 jyldyǵy aıasynda ashylyp otyrǵan Taldyqorǵan qalasyndaǵy «Grand Kóktem» qonaq úı kesheni qaladaǵy eń zamanaýı, sońǵy úlgidegi, joǵary klasty keshen bolǵaly otyr. Astanada ótetin EKSPO-2017 halyqaralyq kórmesiniń ótýine baılanysty joǵary deńgeıdegi qolaıly jaǵdaı qarastyrylǵan qonaq úılerge degen qajettilik ósip otyr. Sheteldik týrısterge usynylǵan nysandar tiziminde Almaty oblysynyń da kórnekti oryndary engizilgen. Týrıstik sala óńirdegi eń mańyzdy salaǵa aınalyp keledi. Sondyqtan oblys ortalyǵy Taldyqorǵan qalasyn kórkeıte túsý – bizdiń basty maqsatymyz. Qonaq úı kesheni jeke ınvestısııaǵa salynǵan, ortaq iske óz úlesin qosyp, Taldyqorǵannyń tartymdy qala bolýyna atsalysady dep senemin», – dedi óz sózinde óńir ákimi Amandyq Batalov.
Jalpy, bul qonaq úı kesheni túrli kólem men kesindegi úsh bloktan turady.
Qonaq úıdiń 3-10 qabatqa deıin bıznes ortalyqtyń keńseleri. Sol sııaqty nysanda májilis zaly, meıramhana kesheni men saltanat zaly, basseıni bar fıtnes ortalyq, jattyǵý jáne qonaq zaldary bar.