El Táýelsizdiginiń 25 jyldyǵy jáne QR Tuńǵysh Prezıdenti kúnine oraı alpınızm jáne quzǵa sporttyq órmeleý federasııasynyń uıymdastyrýymen alpınıster Ile Alataýynyń áıgili shyńy «Nursultan» bıiktigine kóterildi.
«27 qarasha kúni 64 adamnan turatyn alpınıster toby Táýelsizdiktiń 25 jyldyǵy men QR Tuńǵysh Prezıdenti kúnine arnap, «Nursultan» shyńyna kóterilýge attandy. Qar qalyń jaýyp, aýa raıy -27 gradýsqa deıin tómen bolýyna baılanysty 42 adam ǵana dittegen mejege kóterile aldy. Bizdi QR Prezıdenti Apparaty, Almaty ákimdigi, Mádenıet jáne sport mınıstrligi sport jáne dene shynyqtyrý isteri komıteti qoldady. «Nursultan» shyńy Bogdanovıch muzdyǵynyń bas jaǵynda ornalasqan. Soltústiginde Qarlytaý, shyǵysynda Arıstov shyńymen ulasady. Bul shyńǵa 1930 jyly 17 shildede G.Beloglazov bastaǵan top shyǵyp, Kishi Almaty shyńy dep ataǵan. Dál osy jyldy Qazaqstan alpınızminiń bastaýy dep eseptegen. Al 1935 jyly 11 shildede Almatyda 1-Komsomoldyq alpınıada ótip, Kishi Almaty shyńy «Komsomol» ataýyna aýystyryldy. 1997 jyly alpınıadaǵa qatysýshylar Tuńǵysh Prezıdenttiń týǵan kúnine oraı Komsomol shyńyn «Nursultan» shyńy dep ataýdy usyndy. «Nursultan» shyńynda dástúrli alpınıadanyń san túrli jarystary ótkiziledi. Qazaqstannyń táýelsizdik alýymen estafetany qazirgi alpınıster jalǵastyryp otyr», – dedi alpınızm jáne sporttyq quzǵa órmeleý federasııasynyń prezıdenti Q.Valıev.
Aıta keteıik, «Nursultan» shyńynyń bıiktigi 4376 metr.