Keshe L.N.Gýmılev atyndaǵy Eýrazııa ulttyq ýnıversıtetinde oqýda úlgerimi joǵary, ǵylymı-zertteý jumysymen belsene shuǵyldanatyn jáne qoǵamdyq sharalarǵa barynsha atsalysatyn magıstranttarǵa Qazaqstan Respýblıkasy Prezıdenti shákirtaqysynyń kýálikteri tapsyryldy.
Saltanatty rásimge Bilim jáne ǵylym mınıstri Erlan Saǵadıev qatysyp, bolashaǵynan úmit kúttiretin jas ǵalymdarǵa izgi tilegin jetkizdi, sondaı-aq, qazirgi tańda jastardyń bilim alýyna, ǵylymmen aınalysýyna memleket tarapynan jasalyp otyrǵan qamqorlyq turǵysynda áńgimelep berdi.
Quramynda Bilim jáne ǵylym mınıstrliginiń, Kásiptik bilim jáne ǵylym qyzmetkerleri kásipodaǵynyń ókilderi, joǵary oqý oryndarynyń rektorlary men professorlary, mádenıet qaıratkerleri, «Nur Otan» partııasy «Jas Otan» jastar qanatynyń jáne Qazaqstan jastar kongresiniń atqarýshy hatshylary kiretin Konkýrstyq komıssııaǵa bıyl 43 magıstranttyń qujattary usynylypty. Atalǵan komıssııanyń sheshimimen bulardyń arasynan 10 úmitker iriktelip, Qazaqstan Respýblıkasy Prezıdenti shákirtaqysyn alýǵa laıyqty dep tanyldy. Olar: T.Júrgenov atyndaǵy Qazaq ulttyq óner akademııasynyń magıstri Marııa Abadıeva, ál-Farabı atyndaǵy Qazaq ulttyq ýnıversıtetiniń magıstri Gaýhar Asqarova, Qurmanǵazy atyndaǵy Qazaq ulttyq konservatorııasynyń magıstri Irına Gavrılenko, Qazaq ulttyq óner ýnıversıtetiniń magıstri Áıgerim Dáýitbaeva, Q.Sátbaev atyndaǵy Qazaq ulttyq tehnıkalyq ýnıversıtetiniń magıstri Naýryzhan Dildábekov, L.N.Gýmılev atyndaǵy Eýrazııa ulttyq ýnıversıtetiniń magıstrleri Raıhan Janbolatova men Lııa Omarova, Abaı atyndaǵy Qazaq ulttyq pedagogıkalyq ýnıversıtetiniń magıstri Maıra Nurke, Qazaq ulttyq agrarlyq ýnıversıtetiniń magıstri Aıaýlym Nurymbaı, S.Asfendııarov atyndaǵy Qazaq ulttyq medısına ýnıversıtetiniń magıstri Emıl Rahımbaev.
Shara barysynda atalǵan shákirtaqy ıeleri ózderiniń eńbekteri eskerilip, erekshe kóńil bólingenine razy ekenderin jetkizdi. Sondaı-aq, olar Elbasy Nursultan Nazarbaevtyń júrgizip otyrǵan saıasatynyń arqasynda jastarǵa barlyq jaǵdaı jasalynyp jatqanyn sóz etti.
Joldybaı BAZAR,
«Egemen Qazaqstan»