Úsh jylda on bir shaǵyn aýdan boı kóterdi

Tuńǵysh Prezıdent kúni men el Táýelsizdiginiń 25 jyldyǵy qarsa­ńynda Qyzylorda qalasynda 200 tósektik kópsalaly oblystyq balalar aýrýhanasy ashyldy. Aýrýhananyń ashylý saltanatyna oblys ákimi Qyrymbek Kósherbaev, akademık, Qazaqstan pedıatrııasynyń negizin salýshy, Qyzylorda oblysynyń qurmetti azamaty Kamal Ormantaev qa­tysty. Syr jurtshylyǵyn jańa balalar aýrýhanasynyń ashylýy­men quttyqtaǵan aımaq basshysy densaýlyq saqtaý salasynda atqarylyp jatqan nátıjeli ister jóninde aıtty. – Sońǵy úsh jylda oblystyń densaýlyq saqtaý salasyna qaral­ǵan qarjy 9 mıllıard teńgege ósti, ıaǵnı bıylǵy jyldyń ózinde onyń bıýdjeti 32 mıllıard teńgeni qurady. Osylaısha bizdiń óńir densaýlyq saqtaý salasyn qarjylandyrý boıynsha elimizde alǵashqy orynda tur. Osyndaı qarjylaı qoldaýdyń nátıjesinde aımaqtyń densaýlyq saqtaý salasy jaqsy nátıjelerge jetip kele­di. Ana men bala ortalyǵy is­ke qosyldy, mine, búgin ob­lystyq balalar aýrýhanasyn el ıgiligine berip otyrmyz. Endi syrboıylyqtar Astana, Almaty sekildi iri qalalarǵa barmaı-aq, osy jerden medısınalyq qyzmetterdi alatyn bolady. Munyń barlyǵy Elbasymyzdyń baıypty saıasatynyń, elimizdiń táýelsizdiginiń arqasy,– dep atap ótti oblys ákimi. Saltanatty sharada zamanaýı aýrýhananyń ashylýy­men qyzylordalyqtardy Kamal Ormantaev pen sala ardageri Ernııaz Omarov quttyqtap, jyly lebizderin bildirip, aq batalaryn berdi. Jalpy aýdany 25 744 sharshy metr quraıtyn ǵımarattyń qurylysy 2014 jyldyń tamyzynda bastalǵan. Qurylys jumysynyń bas merdigeri – «Dá­neker» JShS. Jańa aýrýhanada 11 bólimshe, 5 ota jasaý blogy, 12 tósekke arnalǵan reanımasııa jáne anestezıologııa bólimshesi, keńes berý-dıagnostıkalyq bólimi ornalasqan. Sondaı-aq, onkogematologııa bólimshe­siniń quramynda qaterli isikke shal­dyqqan bala­lar­dy pallıatıvtik emdeýge ar­nalǵan 5 tósektik bólimshe ashý josparlanǵan. Keńes berý-dıag­nostıkalyq bólimi zamanaýı ÝDZ apparatymen jabdyqtalǵan. Oǵan qosa, sáýleli dıagnostıka KT, MRT apparattary da jumys jasaıdy. Aıtýly merekege oraı Qy­zyl­orda qalasyndaǵy Jap­pasbaı batyr kóshesi boıyna salynǵan kópqabatty úıdi de paı­dalanýǵa berdi. Sáýletti turǵyn úı Qyzylorda qalalyq qurylys bóliminiń tapsyrysy­men salynǵan. Jańa bas­pananyń tabaldyryǵyn apattyq jaǵ­daı­daǵy úılerdiń turǵyndary attady. Bas merdiger «Asar-Qurylys» JShS nysandy ýaqtyly jáne sapaly turǵyzǵandyǵynyń nátı­jesin­de el Táýelsizdiginiń 25 jyl­dyǵy qar­sańyndaǵy tolymdy tartýlar qatary tolyǵa tústi. Sal­­tanatty rásimde sóz sóılegen aımaq basshysy Qyrymbek Kósherbaev: «Sońǵy 3 jylda 7 myńǵa jýyq otbasy, ıaǵnı 30 myń­nan asa turǵyn qonys toıyn toılady. Eki jyl ishinde páter kezeginde turǵandardyń 28 paıyzy baspanaly boldy. Bı­yl bir mezette 80 kópqabatty úıdiń qurylysy júrip jatyr. 2013-2016 jyldar aralyǵynda Qy­zylordada 11 shaǵyn aýdan boı kóterdi. Sońǵy úsh jylda apattyq jaǵdaıdaǵy úılerdiń tur­ǵyndary 144 jańa páterge qol jetkizdi. Al búgin biz taǵy 60 páterdiń kilt­terin tabystaǵaly otyr­myz», dep jańa qonys ıe­lerine páter kiltterin tabys­tady. Jalpy aýdany 4 myń sharshy metrdi quraıtyn turǵyn úıdiń smetalyq quny – 457,6 mıllıon teńge. Oblystyq bıýd­jetten qarjylandyrylǵan nysan­­nyń 20 páteri – 2 bólmelik, 40 páteri – 3 bólmelik. Qýanyshty sátti bas­tan keshken jandardyń biri – Galı­na Smır­nova. Ol «Tıtov» shaǵyn aýda­nyn­daǵy jataqhanadan jańa úıge kóshe­tindigine kópke deıin sene almapty. Balalarǵa arnalǵan oıyn, sport alańdary bar mundaı ásem baspanalar Qy­zylorda qala­synda kóptep saly­nýda. Egemendiktiń shırek ǵasyry tusynd­a jyl aıaǵyna deıin qonystoıyn toı­laıtyndar qatary áli de tolyǵa túseri sózsiz. Erjan BAITILES, «Egemen Qazaqstan» QYZYLORDA