Qazaqstan Respýblıkasynyń Ulttyq Banki 2016 jylǵy 1 jeltoqsannan bastap el Táýelsizdiginiń 25 jyldyǵyna arnalǵan, nomınaldyq quny 10 000 teńgelik mereıtoılyq banknotty aınalymǵa shyǵarady, dep habarlady banktiń baspasóz qyzmeti.
Memleket basshysynyń sýreti beınelengen kýpıýra Táýelsizdiktiń 25 jyldyǵyna arnalǵan. Banknottyń dızaıny aınalystaǵy aqsha belgilerimen biryńǵaı stılde oryndalǵan: bet jaǵynda beıneler basym túrde tiginen, syrt jaǵynda kóldeneńinen ornalasqan. Banknottyń basym túsi – kókshil kúlgin.
Banknottyń bet jaǵyndaǵy negizgi beıneler: «Qazaq Eli» monýmenti, Esik qorǵanynan tabylǵan «Altyn adamnyń» bas kıiminiń bir bóligi – «О́mir aǵashy». Golografııalyq metall jolaqta Astananyń kórinisi, Qazaqstan Respýblıkasy Tuńǵysh Prezıdentiniń faksımılesi jáne kúnniń stıldendirilgen beınesi ornalasqan. Qazaqstan kartasynyń beınesi kólbeý buryshyn ózgertken kezde túsin ózgertetin qorǵanysh elementin bildiredi. Kartanyń betinde «MÁŃGILIK EL» degen jazba bar. Sonymen qatar, Ile Alataýyndaǵy taý tizbegi beınelengen.
Sol jaǵynda ortasynda nomınaldyń sıfrlyq beınelenýi basylǵan. Joǵarǵy oń jaq buryshynda shyǵarýshy bank – «QAZAQSTAN ULTTYQ BANKI», sondaı-aq qoldan jasaǵany úshin jaýapkershilik týraly eskertetin «Banknottardy qoldan jasaý zańmen qýdalanady» degen jazba bar.
Banknottyń syrt jaǵynda negizgi beıne – Qazaqstan Respýblıkasynyń Tuńǵysh Prezıdenti Nursultan Ábishuly Nazarbaevtyń portreti. Portret qaǵazdyń betinde bederlikti qamtamasyz etetin jáne ustaǵan kezde seziletin ıntaglıo (tereń basý) ádisimen oryndalǵan. Álemdik tájirıbede bul ádis banknottardaǵy portretterdi oryndaǵan kezde dástúrli ádis bolyp esepteledi.
Artqy kóriniste Qazaqstan kartasy beınesiniń aıasynda «Báıterek» monýmentin qosa alǵanda, Astana qalasyndaǵy birneshe ǵımarat beınelengen. Qyzǵylt sary qorǵanysh úzik-úzik jip banknottyń kólbeý buryshyna oraı túsin ózgertedi. «Poddelka banknot presledýetsıa po zakoný» degen jazba banknottyń sol jaqtaǵy tómen buryshynda ornalasqan.
Basqa aqsha belgilerimen qatar, bul banknot aınalysqa shyǵarylǵan sátten bastap zańdy tólem quraly bolyp esepteledi, sondaı-aq barlyq tólemder men aqsha aýdarymdarynda qabyldanýǵa mindetti. Taralymy – 100 000 dana.
Aıta keteıik, 15 qarashada Nazarbaev beınelengen jańa kýpıýra tanystyrylǵan bolatyn. Ol banknotpen saýda jasaýǵa da bolady.