Astanada Syrtqy ister mınıstri Erlan Ydyrysovtyń tóraǵalyǵymen «Nurly jol» baǵdarlamasy men Jibek joly ekonomıkalyq beldeýiniń túıisýi» taqyrybynda dóńgelek ústel ótti.
Sheteldik áriptesterdi Qazaqstannyń kólik-tranzıttik áleýetimen, sondaı-aq, «Nurly jol» baǵdarlamasy aıasynda júzege asyrylyp jatqan mańyzdy jobalarmen tanystyrý, aqparattandyrý maqsatynda uıymdastyrylǵan sharaǵa Qazaqstandaǵy elshiler men halyqaralyq uıymdardyń ókilderi qatysty.
Otyrysty ashqan Erlan Ydyrysov óziniń kirispe sózinde Memleket basshysy Nursultan Nazarbaevtyń Qazaqstannyń kólik-tranzıttik áleýetin arttyrýǵa aıryqsha nazar aýdaryp otyrǵanyn atap kórsetti. Onyń sózine qaraǵanda, bul baǵyttaǵy jumystar elimizdiń syrtqy saıasatyndaǵy basymdyqqa ıe sharalardyń biri. Ony Syrtqy ister mınıstrligi qatań baqylaýda.
Budan keıin Investısııalar jáne damý mınıstri Jeńis Qasymbek, «QazAvtoJol» UK» AQ basqarma tóraǵasy Ermek Qızatov, «Eır Astana» avıakompanııasynyń prezıdenti Pıter Foster jáne «Qazaqstan temir joly» UK» AQ vıse-prezıdenti Erkin Jýsanbaev sóz sóıledi. Olar óz salalary boıynsha atqarylyp jatqan jumystar turǵysynda áńgimeleı kelip, Qazaqstannyń kólik-tranzıttik áleýetin sıpattaıtyn kórsetkishterdi sóz etti. Máselen, J.Qasymbek 2010-2015 jyldar aralyǵynda atalǵan salaǵa 23 mlrd dollar kóleminde ınvestısııa salynǵanyn atap kórsetti. Sonymen qatar, ol «Batys Qytaı – Batys Eýropa» kólik dáliziniń tıimdiligin sóz ete otyryp, ústimizdegi jyly bul joldyń qazaqstandyq bóligi tolyq aıaqtalatynyn málim etti.
Dóńgelek ústelge qatysqan sheteldik ókilder atalǵan taqyrypqa qatysty óz oılaryn ortaǵa salyp, usynys-pikirlerin aıtty. Sondaı-aq, olar kólik-tranzıttik jobalardy júzege asyrýda ózderine qatysty jumystardy atqarýǵa daıyn ekenderin, alda turǵan mindetterdi oryndaýǵa barynsha at salysatyndaryn jetkizdi.
Joldybaı BAZAR,
«Egemen Qazaqstan»