Beıbit jıyndar men sherý uıymdastyryp, ultaralyq arazdyqty qozdyrǵany, sondaı-aq jalǵan lańkestik úshin sottalǵandar raqymshylyqqa ilikpeıdi. Bul týraly Parlament Májilisinde «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týral» zań jobasy boıynsha jumys toby otyrysynyń aldynda QR Bas prokýrorynyń birinshi orynbasary Iogan Merkel málimdedi.
«Bul bap zań jobasynyń tizimine raqymshylyqqa shekteý retinde engizilgen. Iаǵnı, osy baptar boıynsha raqymshylyq qoldanýǵa shekteý qoıylǵan. Sonymen qatar, bir top adam jasaǵan jemqorlyq qylmysqa nemese asa aýyr qylmystarǵa da tyıym salynady», – dedi Merkel.
Asa aýyr jemqorlyq qylmys jasaǵandar shyǵyndy tolyǵymen qaıtarǵan kezde jaza merzimin qysqarta alady.
Aıta keteıik, Elbasy Konstıtýsııanyń 61-babynyń 1-tarmaǵyna sáıkes óz bastaýymen Parlament Májilisiniń qaraýyna «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týraly» zań jobasyn engizgen. Bul bastama Májilistiń jumysyna 30 qarashada alynǵan bolatyn.
Atalǵan zań jobasy boıynsha, azamattardyń áleýmettik álsiz toptary, onyń ishinde kámeletke tolmaǵandar, júkti áıelder, kámeletke tolmaǵan nemese múgedek balalary bar áıelder, múgedekter, qart adamdar ári aýyr emes qylmystyq quqyq buzýshylyqtar jasaǵandar qylmystyq jazadan bosatylady.