Búgin «QAZAQ AIR» áýe kompanııasy Oral-Atyraý baǵytynda jańa reısti bastady, dep habarlaıdy QazAqparat.
«QAZAQ AIR» AQ-nyń basqarma tóraǵasy Blek Polloktyń atap ótkenindeı, bul – atalmysh áýe kompanııasynyń marshrýttyq jelisindegi on ekinshi qala. Qazaqstanda áýe ushaqtaryn ótken jyldyń ortasynan bastap ushyra bastaǵan kompanııa osy kezge deıin 180 myń adamǵa qyzmet kórsetken. Muny jyl aıaǵyna deıin 200 myńǵa jetkizý kózdelýde. Jolaýshylardy osy ushaqty óndiretin zaýyttan alynǵan úsh jańa «Bombardier» tasymaldaýda.
«Biz Qazaqstandaǵy eń jas áýe flotyn paıdalanýdamyz. Konsaltıngtik qyzmet kórsetken halyqaralyq áýe kompanııalarynyń kómegimen jumys jasaýdamyz. Jergilikti 12 ushqysh «Bombardier» ushaǵyn basqarýǵa mamandaný úshin Eýropada bilim-biligin jetildirýde. Olar jyl aıaǵyna qaraı qyzmetine kirisedi. Atyraýdan Oralǵa jáne keri baǵytta jolaýshylar aptasyna eki ret - juma jáne jeksenbi kúnderi «Bombardier Q400» bortynda sapar shegýge múmkindik alady. Bul ushaqtarda ushý qolaıly, barlyq jaǵdaı jasalǵan. Aldaǵy jyly jańa ushaqtar alyp, qalaaralyq ushý reısteriniń sanyn arttyratyn bolamyz», – dedi Brek Pollok.
«Oral» halyqaralyq áýejaıynyń bas dırektory Haıredın Rysqalıevtiń aıtýynsha, búginnen bastap barlyq áýe kompanııalary Oralǵa jolaýshylar tasymaldaýda. Mysaly, «Eır Astana», «Bek eır» Almaty, Astana baǵytynda qyzmet kórsetse, «QAZAQ AIR» Atyraý, «Skat», «Bek eır» ushaqtary jolaýshylardy Aqtaýǵa jetkizedi. Aldaǵy jyly «Sıbır» áýe kompanııasy Máskeý baǵytynda reıs ashýdy oılastyrýda. Oblys ákimi Altaı Kólginovtiń usynysyna sáıkes «Eır Astana» Eýropaǵa jol ashpaqshy. Taǵy bir jańalyq, áýejaı ǵımaratyn jóndeý jóninde oblys ákimdigi men «QPO b.v.» kompanııasy arasynda kelisimge qol jetkizildi. Bul maqsatqa 1 mlrd. astam teńge qarastyrylmaq. Bul jumystar aldaǵy jyly bastalady. Eske sala keteıik, budan buryn 2015 jyly respýblıkalyq bıýdjetten bólingen 7 mıllıardtaı teńgege áýejaıdyń ushý-qoný jolaǵy qaıta jóndelip, keńeıtilgen bolatyn.