Qyzylordada eki kúnnen beri aýyr atletıkadan erler men áıelder arasynda Qazaqstannyń Tuńǵysh Prezıdenti kúnine arnalǵan Kýbok saıysy ótip jatyr. Oǵan Almaty qalasy men barlyq oblystardan 152 sportshynyń basyn biriktirgen 15 komanda qatysýda.
Keshege deıin áıelderdiń – 4, erlerdiń 2 salmaq dárejesi boıynsha júldegerler belgili boldy. Al 94 kıloǵa deıingi salmaqtyń jeńimpazyna Ilıa Ilınniń arnaıy Kýbogi men sertıfıkaty tabys etiledi.
Jarystyń birinshi kúni 48 kıloǵa deıingiler arasynda Almaty oblysynan kelgen Iýlııa Potasova qossaıysta 125 kg (55+70) salmaqty baǵyndyryp, birinshi oryndy jeńip aldy. Ekinshi orynǵa osy oblystyń kelesi ókili – Natalıa Bedrık, úshinshi orynǵa jambyldyq Aınur Ábdihalyqova ornalasty. Sondaı-aq, 53 kıloda Almaty qalasynyń atleti Ásel Amangeldi 175 kg (79+96) salmaqpen aldyna jan salmady. Kúmis medal Almaty oblysynyń ókili Aleksandra Lachkovaǵa, qola medal aqtóbelik Aqmaral Úrgenishbaevaǵa buıyrdy. Erler arasynda 56 kıloǵa deıingi salmaqtyń bas júldesin Almaty oblysynyń sańlaǵy Igor Son enshiledi. Ol 235 kg (105+130) nátıjesimen bárinen basym tústi. Ekinshi satyǵa Almaty qalasynyń ókili Ashat Dildaev, úshinshi tuǵyrǵa qyzylordalyq Almat Asanhanuly jaıǵasty.
Jarystyń ekinshi kúninde áıelderdiń 58 kg salmaǵynda qostanaılyq Sáýle Sádýaqasova 183 kg (83+100) nátıjesimen top jardy. Kelesi eki oryndy shyǵysqazaqstandyqtar Lıdııa Anýfrıeva men Mádına Astamırova aldy. Budan keıin 63 kg salmaqtyń myqtysy bolyp qyzylordalyq Ásem Sadyqova tanyldy. Ol qossaıysta 195 kg (85+110) salmaqty erkin eńserdi. Ekinshi-úshinshi oryndarǵa shyǵysqazaqstandyq Darıa Pavlova men Almaty qalasynyń ókili Krıstına Krahaleva kóterildi. Al erlerdiń 62 kıloǵa deıingi salmaǵynda qyzylordalyq Erbolat Jolamanov úzdik kórindi. Ol bul úshin jıyntyǵynda 263 kg (117+146) salmaqty tóbesine tik ustap turdy. Júldegerler úshtigin Almaty qalasynyń atletteri Anatolıı Savelev pen Tımýr Hasarov tııanaqtady.
Jarys 5 jeltoqsan kúni márege jetedi.
Laýra ShOŃǴALOVA
QYZYLORDA