S.Muqanov atyndaǵy kitaphanada «Uly Dala eli – Táýelsizdiktiń 25 negizi» aksııasy aıasynda otbasy qundylyqtaryn ulyqtaýǵa arnalǵan shara ótti. Onda aımaq basshysy Erik Sultanov kóp bala tárbıelep ósirgen «Kúmis alqa» jáne «Altyn alqa» ıegerlerimen, kásibı áýlettermen kezdesip, alda kele jatqan aıtýly merekemen quttyqtady.
– Elbasy bala tárbıesine, áke men shesheniń otbasyndaǵy róline árkez úlken kóńil bólip keledi. Berik shańyraq – qoǵamymyzdyń ómirsheńdiginiń, turaqtylyǵynyń kepili. Otbasynda ǵana bala ózin barynsha baqytty sezinedi. Taǵdyrdyń bar qıyndyǵynan súrindirmeı alyp shyǵatyn da, ómirge qushtarlyqty qalyptastyryp, shabyttandyratyn da – otbasy», deı kelip, Erik Hamzauly alty bala tárbıelep ósirgen bir top anaǵa «Kúmis alqa» belgisin tapsyrdy.
Búginde óńirde 4,9 myńǵa jýyq kóp balaly ana turady. Olardyń atynan sóz alǵan eńbek ardageri Qymbat Ismanova jınalǵandarmen júrekjardy lebizderin bólisti. «Otan otbasynan bastalady. Tek irgesi berik shańyraqta ǵana deni saý, qabiletti bala tárbıelenedi. Elimizde jetim jáne ata-ananyń qamqorlyǵynsyz qalǵan balalarǵa da jan-jaqty kómek kórsetiledi», dese, «Levın» jeke kásipkerliginiń dırektory Elena Levına tórt bala ósirgenin, úsh nemereniń ájesi ekenin, olardyń jetistikteri qýanysh pen mereıge bóleıtinin jetkizdi.
Jıynda balalardy asyrap alý, qamqorshylyq pen qorǵanshylyqqa, patronattyqqa alý jıilep kele jatqany da aıtyldy.
О́mir ESQALI,
«Egemen Qazaqstan»
Soltústik Qazaqstan oblysy