Elimizde jeltoqsannyń úshinshi on kúndiginde mınýs 38-ge deıin aıaz túsýi múmkin dep boljaıdy sınoptıkter. Qazgıdromettiń jeltoqsan aıyna jasaǵan boljamyna sáıkes osy aıdaǵy aýanyń ortasha temperatýrasy Batys Qazaqstan, Soltústik Qazaqstan, Aqmola, Pavlodar, Aqtóbe men Qostanaı oblystarynyń kóp bóliginde normadan 1 °S tómen, respýblıkanyń qalǵan aýmaǵynda - normaǵa jýyq bolady dep kútilýde.
Jaýyn-shashynnyń aılyq mólsheri: Atyraý, Mańǵystaý, Qyzylorda oblysynyń keı jerlerinde - normadan tómen; Batys Qazaqstan, Soltústik Qazaqstan, Aqmola, Pavlodar, Aqtóbe men Qostanaı oblystarynyń kóp bóliginde, Shyǵys Qazaqstan, Almaty, Jambyl, Ońtústik Qazaqstan oblystarynyń taýly jáne taý bókteri aýdandarynda - normadan joǵary; qalǵan aýmaqta - normaǵa jýyq bolady.
«Jeltoqsandaǵy qubylmaly aýa-raıy belsendi sıklondardyń jıi ótýimen jáne olarǵa qatysty bolatyn atmosferalyq fronttarmen baılanysty bolyp, elimizdiń soltústik jartysynda qar jaýyp, jel kúsheıip, burqasyn turady, ońtústik jartysynda tuman basyp, kóktaıǵaq qubylystary oryn alady. Al jeltoqsannyń 5-8, 10, 13-16 kezeńindegi sýyq antısıklonnyń taralýymen - ashyq birqalypty aıazdy aýa-raıy kútiledi», delingen habarlamada.
Kúnilgergi boljam boıynsha Táýelsizdik kúni merekesinde aýa temperatýrasynyń edáýir tómendeýi kútilýde, sol kezde termometr baǵany: batysta 13-14 jeltoqsanda túnde 23...28-ge deıin, kúndiz 17...22-ge deıin aıazdy; elimizdiń soltústiginde, ortalyǵynda jáne shyǵysynda 14-16 jeltoqsanda túnde 25...33-ke deıin, kúndiz 20...25-ke deıin aıazdy; ońtústik pen ońtústik-shyǵysta 15-16 jeltoqsanda túnde 13...20 deıin, kúndiz 8...13-ke deıin sýytady.
«Uzaq merzimdi boljamǵa sáıkes aıdyń úshinshi on kúndiginde aýa temperatýrasynyń tómendeýi: soltústik jartysynda túnde 30...38-ge deıin aıaz, kúndiz 23...28-ge deıin aıaz; ońtústik jartysynda túnde 20...25-ge deıin aıaz, kúndiz 13...18-ge deıin aıaz kútilýde», dep habarlady «Qazgıdromet» RMK-i.