Rejısser, prodıýser Aqan Sataevtyń esimi otandyq stýdııanyń «Reketır», «Aǵaıyndy», «Adasqan», «Jaýjúrek myń bala» sekildi fılmderinen kópke tanymal. О́nerli jandardyń otbasynda dúnıege kelgen daryndy bala áke-sheshesiniń taǵdyry eleń etkizer adamdardyń ómiri týraly jıi aıtyp otyratyn áńgimelerin tyńdap ósedi. Balalyq shaqtan este qalǵan bundaı áńgimelerdiń keıbiri keıin onyń óner jolynda ony kıno etip túsirýge túrtki de bop jatty. Onyń biri bıylǵy jyly usynylǵan rejısserdiń jańa týyndysy – «Anaǵa aparar jol» fılmi. Bul fılm az ýaqyttyń ishinde halyqaralyq «Eýrazııalyq kópir» kınofestıvalinde bas júldege ıe bolǵany esimizde.
Rejısser «Astana aqshamy» gazetine bergen suhbatynda «Munda eń bastysy, izgilik, patrıottyq sezim, anaǵa, adamzatqa, týǵan Otanǵa, otandastarǵa degen súıispenshilik dáriptelgen. Kıno búgingi tańda qoǵamdaǵy eń úlken tárbıe, ıdeologııa quraly ekeni ras bolsa, bul kartına talaı júrekke jylý beredi ǵoı dep oılaımyn», dedi. Bul fılmniń shynshyldyǵy kınoteatrǵa kórý úshin barǵan aǵa býyn kórermenderdiń qyzyǵýshylyǵynan da ańǵaryldy. Talaı kórermen kózine jas aldy...
Aqan Qarǵambaıulynyń qaı kınosy da ıdeıasy izgilikti nasıhattaıdy. Jalpy kópke málim derektiń biri, Aqannyń shyǵarmashylyǵy arqyly óz jolyn kıno ónerinde taýyp, aıqyndap júrgen jas akterlerdiń (juldyzdardyń) shyǵýy. Máselen, rejısserdiń óz sózimen aıtqanda «Raıony» fılminen 4-5 daryndy balalar shyqpaq. Bul da onyń kásibıliginiń bir kórinisi bolsa kerek.
Aqan Qarǵambaıuly óz eńbek jolyn T.Júrgenov atyndaǵy óner shańyraǵynda bilim alǵan toqsanynshy jyldary «Allajar» (1993) jáne «Jas akkordeonshynyń ómirbaıany» (1999) fılmderine túsýden bastady. О́ner jolyn akterlik oıyndardan bastaǵan rejısser talaby árqashan da ózgeshe jáne joǵary bolmaq. Sondyqtan bolar, Aqannyń keıipkerleriniń rolderi kórermenniń kóńil túıtkilindegi oılarmen astasyp, adamnyń jan saraıyndaǵy aıtyla bermeıtin syrlardy qozǵaıdy. Onyń qaı fılmi usynylsa da, kópshiliktiń jyly qabyldaýyna bólenip otyrdy. Ol qoǵamdaǵy ózekti máselelerdi qozǵaýmen qatar, shyǵarmashylyǵynda tarıhı, patrıottyq taqyryptarǵa da oryn berdi.
Bir qyzyǵy, onyń túsirgen týyndylary jasty da, kárini de kınoteatrǵa shaqyrady. Jáne de jańa túsirilimdi tamashalap qaıtqan adam ókinbeı, rýhanı azyq alyp qaıtady desek, artyq emes.
Qazaqstannyń eńbek sińirgen qaıratkeri, izdenimpaz rejısser Aqan Sataevtyń qazaq kınosynyń órkendeýine qosary áli alda. Ol alda alatyn bıik asýlary bar naǵyz shyǵarmashylyq adamy.
Baqyt JOLDYBAIQYZY