Qurlyqtyq hokkeı lıgasynyń turaqty chempıonatynda Astananyń «Barysy» Iаroslavlde jergilikti «Lokomotıvpen» kezdesip, 1:7 esebimen oısyraı utyldy.
Matchtyń birinshi kezeńinde aıdyn ıeleri aıqyn basymdyqqa ıe boldy. Aldymen, 6-mınýtta Brendon Kozýn qaqpany dál kózdese, birer mınýt óter-ótpes Maksım Talbo esepti eseleı tústi. Bul tusta «Lokomotıv» oıynshy basymdyǵyna ıe bolǵanyn aıta ketken jón. Qarqynyn arttyrǵan olar 8-mınýtta Pavel Koledovtyń kómegimen úshinshi shaıbany soqty. Al 11-mınýtta Vladıslav Kartaev nátıjeli soqqynyń avtory atandy.
Oıynnyń ekinshi kezeńinde de birqatar qaýipti shabýyldar oryn aldy. 27-mınýtta «Barys» sapynan Ivan Kýchın esep sanyn qysqartqan bolatyn. Alaıda, 37-mınýtta Brendon Kozýn besinshi shaıbany soǵyp ketti.
Kezdesýdiń úshinshi kezeńinde de aıdyn ıeleri qarqynyn báseńdetpedi. 54-mınýtta Brendon Kozýn bul kezdesýdegi het-trıgin jasasa, matchtyń aıaqtalýyna sanaýly sekýndtar qalǵanda Andreı Loktıonov sońǵy núktesin qoıdy.
Búginde 36 oıynnan 47 upaı jınaǵan astanalyqtar «Shyǵys» konferensııasynda 10-orynda keledi. Kelesi kezdesýin 7 jeltoqsan kúni Ekaterınbýrgte «Avtomobılıst» komandasymen ótkizedi.