Qazaqstan halqynyń 88 paıyzy otandyq telearnalardy kóredi. Bul týraly búgin Parlament Májilisindegi Úkimet saǵatynda QR Aqparat jáne kommýnıkasııalar mınıstri Dáýren Abaev aıtty.
«Esepteýler nátıjesine sáıkes, teleaýdıtorııanyń 88 paıyzy qazaqstandyq arnalardy tańdaıdy. Sonymen birge olardyń 53 paıyzy arnalarymyzdy kúndelikti kórýde. Bizdiń maqsat bul kórsetkishti arttyrýǵa negizdelgen, sebebi qazirgi zamanǵy álemde tele-radıo habar taratý qoǵamdaǵy ońtaıly ózgeristerdiń katalızatorlarynyń biri bolyp tabylady»,-dedi mınıstr.
Mınıstrdiń aıtýynsha, mınıstrliktiń tapsyrysy boıynsha aýqymdy áleýmettik zertteý júrgizilip, qazaqstandyqtardyń medıa-tańdaýyn anyqtaýǵa baǵyttalǵan sharalar atqaryldy. Alynǵan qoldanbaly málimetterdiń negizinde BAQ-ty modernızasııalaý men ulttyq aqparattyq keńistikti júıeleýdiń negizgi jobalary qalyptastyryldy. Onyń ishinde «Habardyń» ustanymy ózgerdi. «24 kz» «Habar 24» telearnasy bolyp rebrendıng júrgizildi, «Kazakh TV» telearnasy «Bilim jáne mádenıet» telearnasymen biriktirildi. Sonymen qatar «Kazsport» telearnasy zamanaýı HD formatqa kóshirildi, munymen qosa «Qazaq radıosy», «Shalqar» jáne «Classic» radıolarynyń qamtý aýmaǵy keńeıtildi.
Sonymen qatar Dáýren Abaev Qazaqstan aýmaǵynyń 73%-y ınternet jelisine qosylǵanyn, biraq ol alystaǵy aýyldarǵa jete qoımaǵanyn aıtty. Sondyqtan aldymyzdaǵy 2 jylda "Internet aýylǵa" baǵdarlamasy qolǵa alynyp, 1200 perspektıvaly eldi mekenge Internet jelisi jetkiziletin bolady.