Keıbir oqý, tilderdi úıretý kýrstarynyń, medısınalyq, qaıyrymdylyq jáne basqa da qurylymdardyń qyzmeti aıasynda dindi úgitteýge talpyný faktileri tirkelgen. Mundaı jaǵdaılarda din isteri basqarmalary jáne quqyq qorǵaý organdary olardy jaýapkershilikke tarta alady. Bul týraly Ortalyq kommýnıkasııalar qyzmetinde ótken baspasóz konferensııasynda Din isteri jáne azamattyq qoǵam vıse-mınıstri Berik Aryn málimdedi.
Ol «Dinı qyzmet jáne birlestikter týraly» zańnyń tolyqqandy oryndalýyn qamtamasyz etý elimizdegi dinı ahýaldyń turaqtylyǵyn saqtaýdyń kepili bolatynyn, destrýktıvti dinı aǵyǵmdardyń jat ıdeıalarynyń taralýyna tosqaýyl qoıýǵa múmkindik beretinin atap ótti.
«Búgingi tańda bul Zań din salasyndaǵy qatynastar men dinı qyzmettiń quqyqtyq negizin qalyptastyrady. Oǵan sáıkes memleketimizde dinı qyzmetpen aınalysýǵa tek resmı tirkelgen dinı birlestikterge ǵana ruqsat berilgen. Zańsyz dinı nasıhat áreketteri quqyqqa qaıshy keledi jáne ondaı nasıhattaýshylar ákimshilik jaýapkershilikke tartylady», – dedi B.Aryn.
Mysal retinde ol keıbir oqý, tilderdi úıretý kýrstarynyń, medısınalyq, qaıyrymdylyq jáne basqa da qurylymdardyń qyzmeti aıasynda dindi úgitteýge talpyný faktileri tirkelgenin aıtty. Mundaı quqyqqa qaıshy keletin jaǵdaıda din isteri basqarmalary jáne quqyq qorǵaý organdary olardy jaýapkershilikke tarta alatynyn jetkizdi.
«Qulshylyq etý, dinı joralar, rásimder jáne dinı jıyndar sekildi dinı is-sharalar zańmen belgilengen oryndarda esh kedergisiz ótkiziledi. Budan basqa dinı is-sharalar ákimdiktermen kelisilgen jeke ǵımarattarda júrgizile alady. Barlyq meshitterde jáne ózge dinderdiń ǵımarattarynda ózderiniń ishki erejeleri bar. Olar dinniń jáne dinı qaǵıdalardyń erekshelikterin eskere otyryp jasalǵan», – dep atap ótti vıse-mınıstr.
Aıdar О́risbaev, «Egemen Qazaqstan».