Aıtaqyr asfalt betine qyzyl boıaýmen boıalǵan, bálkim, kóp ustalǵandyqtan álde boıaýdyń áserinen jyp-jylmaǵaı, shetteri mújilgen qyzyl asyq shorshyp tústi.
– Alshy tústi! – dep aıqaılady asyqty ıirgen bala, qýanyshtan óńi bal-bul janyp.
Úlken qalada, asfalt betinde asyq oınaǵan balany tuńǵysh kórýim. Álde buryn kórdim be eken. Áıteýir, baıqamappyn. Qym-qýyt qala tirshiliginde, bar adamnyń sanasy kompıýterlendirilgen zamanda asyq oınaǵan birtúrli tosyn kórinedi eken.
– Alshy túsken degen ne? – dep suradym men. Baıaǵyda, bala kezdegi kókirekte jattalyp qalǵan kóne sýretterdi tiriltkim kelip.
Sony da bilmeısiz be degendeı, asyq oınaǵan bala uzaq tańyrqap qarady. Sodan soń asyq jaıyn áńgimelep ketti.
– Biz «úsh taban» oınap jatyrmyz. Oıyn sharty boıynsha Beriktiń asyǵyn men saqammen dál tıgizip ushyrsam, asyq turǵan jer men asyqtyń túsken ornynyń arasyna úsh taban syısa, asyq meniki. Meniń aıaǵym kishkentaı ǵoı, aǵa. Al Berik maıtaban. Onyń tabandary pildikindeı. Qansha ushyrsa da, úsh tabany syımaıdy, – dep qýaqylana kúldi asyqshy bala.
Asfalt betinde asyq oınaǵan balalarmen jaǵalasyp, asyq oınaýdyń erejesin úırengim kelip ketti. Alshysy – asyqty ıirgende tabany jerge tıip, turyq túsýi eken. Eń birinshi osyǵan mán beriledi, ıaǵnı birinshi oryn. Asyqty ıirgende shuńqyrlaý tabany jerge tıse, ol táıke dep atalady eken. Dóńes jony ústine qarap, etpetinen jatsa, búk túskeni. Ol – úshinshi oryn. Shuńqyr qursaq jaǵy ústine qarap, etpetinen jatyq tússe, tórtinshi dáreje, ol shik tústi dep atalady eken.
Aıtaqyr asfalt betinde asyq oınaǵan eki balamen qosylyp, birge oınaǵym kelip ketkeni. Bul da ózinshe bir dene shynyqtyrý, balalardy shalt qımylǵa, tosyn sheshim qabyldaýǵa mashyqtandyratyn tıimdiligi mol dúnıe. Ári sonaý bala kezden jadymyzda jattalǵan oıynnyń tylsym syryna qushtarlyǵymyzdy arttyrǵan estelik tárizdi.
Baıqal BAIÁDILOV,
jýrnalıst