Almaty kınostýdııasynyń 70 jyldyǵyna oraı ashyldy
«Eýrazııa-2011» kınofestıvaliniń aıasynda Sh.Aımanov atyndaǵy «Qazaqfılm» kınostýdııasynda qazaq kıno maıtalmandaryna arnalǵan «Juldyzdar alleıasy» ashyldy.
Osydan 70 jyl buryn, soǵystyń surapyl jyldarynda Almaty kınostýdııasy retinde negizi qalanǵan «Qazaqfılm» stýdııasynda «Juldyzdar alleıasy» osydan biraz jyl buryn paıda bolǵan edi. Alaıda, onyń resmı túrdegi ashylýy ulttyq kınostýdııamyzdyń mereıli jylyna oraılastyrylyp otyr.
– Búginnen bastap ulttyq kınojuldyzdar alleıasy óziniń memorıaldyq sıpatyna ıe bolyp qana qoımaı, endi aramyzda jer basyp, ómir súrip jatqan aǵalarymyzdyń attarymen tolyqtyryldy. Bul juldyzdy alleıa dúnıeden ótken adamdarǵa ǵana qurmet emes, sonymen qatar, búginde kózi tiri, qasymyzda júrgen, qazaq kınosynyń damýyna qomaqty úles qosqan adamdardyń da eńbegin baǵalaý úshin jasalǵan qurmet, – dedi Sh.Aımanov atyndaǵy «Qazaqfılm» kınostýdııasy» AQ prezıdenti Ermek Amanshaev alleıanyń ashylý saltanatynda.
Buǵan deıin «Juldyzdar alleıasyna» qazaq kınosynyń damýyna úles qosqan Sháken Aımanov, Sultan Qojyqov, Májıt Begalın, Abdolla Qarsaqbaev, Seráli Qojamqulov, Qalıbek Qýanyshbaev, Ámına О́mirzaqova, Ánýar Moldabekov, Ydyrys Noǵaıbaev, Nurmuhan Jantórın, Kenenbaı Qojabekov syndy kıno maıtalmandaryna estelik juldyzdar qoıylǵan bolatyn. Endi olardyń qataryna taǵy da 3 estelik taqta qosyldy. Ol «juldyzdy taqtalar» – KSRO jáne Qazaqstannyń halyq ártisi, Memlekettik syılyqtyń laýreaty, teatr jáne kıno akteri Asanáli Áshimovtiń, Qazaqstan Respýblıkasynyń eńbek sińirgen óner qaıratkeri, Memlekettik syılyqtyń laýreaty, qazaq anımasııa óneriniń negizin qalaýshy Ámen Qaıdarovtyń jáne Qazaqstannyń halyq ártisi, Memlekettik syılyqtyń laýreaty, ulttyq derekti kınematografııanyń negizin qalaýshylardyń biri Oraz Ábishevtiń qurmetine ornatyldy.
– Kózi tiri kezimde juldyzdy taqta qoıyp jatqany bir jaǵynan yńǵaısyz, ekinshi jaǵynan qýanyshymdy da jasyrmaımyn. Bul taqtany meniń eńbegime berilgen baǵa dep bilemin, – dedi Asanáli Áshimov.
Aınash ESALI.