Kendi Altaıda dala órtteriniń kezeńi bastaldy. Táýligine orta eseppen órt sóndirýshiler qurǵaq shópti sóndirýge 40 ret shyǵady. Mamandardyń aıtýynsha, eger adamdar órt qaýipsizdigi erejelerin saqtasa, bul kórsetkishti jartylaı azaıtýǵa bolatyn edi. Esepke júginetin bolsaq, dala órtteriniń shyǵýynyń 90 paıyzy adamdardyń otty abaısyz qoldanýy men nemquraıdy qaraýynan bolady.
Jyldyń basynan ShQO-da 22 myń gektar aýdandy qamtyǵan 42 dala órti tirkelgen. Mamandardyń aıtýynsha, bul kórsetkish áli de ósedi. О́rt qaýpi kezeńi qurǵaq, jyly aýa raıyna baılanysty uzaqqa sozylýy múmkin. Qurǵaq qýraılar, shópter, butalar nóser jaýyn men aıazdar bastalǵanǵa deıin janatyny belgili. «Dala jáne orman órtterin sóndirý ońaı is emes, – deıdi oblystaǵy dala jáne orman órtteri jumystaryn úılestirý jónindegi bas maman Andreı Ivanov. – О́rtti sóndirý birneshe kúnge, tipti birneshe aptaǵa sozylýy múmkin. Ol órttiń shyqqan jeri men aýa raıy jaǵdaıyna baılanysty. Eger órt taýly-quzdy jerlerde bolsa, onda ol jerge mamandandyrylǵan kólikter bara almaıdy. Ondaı kezde órt qolmen óshiriledi, soǵan baılanysty ýaqyt ta, kúsh te kóp jumsalady. Al eger órtti basqarý, óz kúshterimen aýyzdyqtaý múmkin bolmasa, onda áýe kúshteri kómegine júginýge týra keledi. Bizdiń basty maqsatymyz – órttiń jaqyn mańdaǵy aýylǵa taralýyna jol bermeý jáne tabıǵattyń ásemdigin saqtap qalý. Sondyqtan osyndaı sátterde túsinistikpen birigip, jumyla áreket jasaý qajet».
Eń bastysy, orman órtinen saqtaný shart.
Ońdasyn ELÝBAI,
Shyǵys Qazaqstan oblysy.