Atyraýda «Damý» qory arqyly 381 jobaǵa qoldaý kórsetildi

«Bıznestiń jol kartasy-2020» baǵdarlamasy aıasyndaǵy jumystar sýbsıdııalaý negizinde júzege asyp otyr. О́ńirlik kommýnıkasııalar qyzmetinde ótken brıfıngte «Damý» kásipkerlikti damytý qory» AQ Atyraý aımaqtyq fılıalynyń dırektory Álııa О́tepqalıeva osyndaı málimetterdi baıandady.  Qarjylandyrylǵan jobalardyń ishindegi 124-i aýyldaǵy bıznes nysandaryna tıesili. Al áıel kásipkerler usynǵan 181 joba maquldanǵan. Jobalardy sýbsıdııalaýda aımaq boıynsha «Qazaqstan Halyq Banki» AQ, DB «Reseı jınaq Banki» AQ, «Bank Sentr Kredıt» AQ belsendi qatysyp keledi. Paıyzdyq mólsherlemeni sýbsıdııalaý quralyn paıdalanǵan tanymal jobalardyń ishinde burynǵy tikushaq zaýytynyń ornyna turǵyzylǵan «Baizar» oıyn saýyq ortalyǵy, «GoldenBridgeCompany» JShS, JK «Jolmýhanov» («SultanPalaceHotel» qonaq úı qurylysy), «Infınıtı Orda» JShS (Fıtnes ortalyǵynyń qurylysy), JK «Neıbart» (tigin sheberhanasy) sekildi nysandar bar.  Atyraý oblysy jas kásipkerlerdiń jobasyn qoldaý boıynsha Astana qalasynan keıin ekinshi orynda. «Biryńǵaı baǵdarlama boıynsha jas kásipkerlerdiń 36 jobasy maquldandy, – deıdi Á.О́tepqalıeva. – Oblys ákimdigimen birge qurylǵan «Altyn keme» baǵdarlamasy ótken jyly 500 mln teńge bóldi. Qazir osy arqyly 21 joba qarjylandyryldy».  «Bıznestiń jol kartasy – 2020» baǵdarlamasy aıasynda kásipkerlikti qarjylaı emes qoldaý sharalary júrgizilýde. «Shaǵyn jáne orta kásipkerliktiń top – menedjmentin oqytý» jobasy Astana qalasyndaǵy Dıýk Ýnıversıtetimen (AQSh) birikken «Nazarbaev Ýnıversıteti» DBU Joǵary mektebiniń bazasynda oqýǵa múmkindik beredi. О́tken jyly Atyraý oblysy boıynsha atalǵan joba arqyly 17 kompanııa basshylary oqýǵa bardy.  «Jańa bıznesti ashýdy qoldaý» jobasy boıynsha kásipkerlikti qoldaý ortalyǵynyń bazasynda 134 adam oqytyldy, bes kásipker memlkettik qoldaýǵa ıe bolyp óz isterin ashty. «Damý» kásipkerlikti damytý qory» AQ Atyraý aımaqtyq fılıaly dırektorynyń aıtýynsha, «StartUp Akademııa» jobasy isin jańadan bastaǵan kásipkerlerge óz bıznes – ıdeıalaryn júzege asyrýǵa jáne damytýǵa qolaıly jaǵdaı týǵyzyp otyr. Sondaı-aq, isin jańadan bastaǵan kásipkerlerdi keshendi túrde qoldaý maqsatynda H.Dosmuhamedov atyndaǵy Atyraý memlekettik ýnıversıtetimen «Bıznes – kovorkıng» ashýǵa kelisim ornatyp, yntymaqtastyq jáne ózara túsinýshilik memorandýmyna qol qoıylǵan.  «Damý» qorynda Kásipkerlikti qoldaý ortalyǵy bar. О́tken jyly 3331 tulǵa osy ortalyqtyń kómegin kórdi. «2009 jyldan beri júzege asyrylyp kele jatqan «Damý Kómek» baǵdarlamasy arqyly múmkindigi shekteýli azamat óz isimen aınalysýǵa qajetti qural alady. Jyl basynan beri atalǵan baǵdarlama aıasynda JK «Sarbalına», JK «Majıtov», JK «Neıbart» JShS, «KaspııMunaıGaz» basshylary 4 múmkindigi shekteýli kásipkerlerge demeýshilik kórsetti», – deıdi Á.О́tepqalıeva.  Baqytgúl BABASh,  «Egemen Qazaqstan».  ATYRAÝ