Saltanatty rásim Máskeýdegi Qutqarýshy Hrıstos hramynda ótti. «Qazaqstan Respýblıkasynyń Prezıdenti Nursultan Nazarbaevtyń Jarlyǵymen Orys pravoslav shirkeýiniń jetekshisi «Memlekettik jáne qoǵamdyq qyzmetke, eldiń áleýmettik-ekonomıkalyq jáne mádenı damýyna qosqan úlesi, halyqtar arasyndaǵy dostyq pen yntymaqtastyqty nyǵaıtýdaǵy sińirgen eńbegi úshin» joǵary nagradaǵa ıe boldy» delingen habarlamada.
Imanǵalı Tasmaǵambetov Qazaqstan Respýblıkasy men el Prezıdenti Nursultan Nazarbaevtyń atynan nagrada tapsyrý úlken mártebe ekenin aıtty. "Bul Sizdiń beıbitshilik pen kelisimdi, eki el halyqtary arasyndaǵy dostyq qarym-qatynastardy nyǵaıtýdaǵy zor eńbegińizge degen aıryqsha qurmet"- dep atap ótti qazaqstandyq dıplomat.
Tasmaǵambetov Qazaqstanda ıslammen qatar, pravoslav dini de qoǵamdyq ómirde erekshe orny bar jetekshi konfessııalardyń biri ekenin aıtty.
Patrıarh Kırıll ózine kórsetilgen joǵary marapat úshin Qazaqstan Prezıdenti Nursultan Nazarbaevqa alyǵysyn jetkizip, barsha qazaq halqyna beıbit ómir men ósip-órkendeýine nıettestik bildirdi.
«Dostyq» ordeni - Qazaqstan Respýblıkasynyń joǵary nagradalarynyń biri. Bul ordenmen qoǵamdaǵy ultaralyq jáne azamattyq tatýlyqty saqtaýda jemisti jumys atqarǵan, halyqtar arasyndaǵy beıbitshilikti, dostyq pen yntymaqtastyqty nyǵaıtýǵa eńbek sińirgen azamattar marapattalady. Orden ıegerleriniń arasynda - BUU Bas hatshysy Pan Gı Mýn, UQKU bas hatshysy Nıkolaı Bordıýja, Máskeý jáne búkil Reseı Patrıarhy Aleksıı II, AQSh Prezıdenti (1989-1993) Djordj Býsh (úlkeni), AQSh-tyń 67-shi Memlekettik hatshysy Hılları Klınton, Ulybrıtanııanyń Premer-mınıstri (1979-1990) Margaret Tetcher, kardınal-epıskop, kardınaldar alqasynyń dekany (2001) Andjelo Sodano, Saýd Arabııasynyń patshasy - Abdýlla ıbn Abdýl Azız as-Saýd, Horvatııa Prezıdenti (2000- 2010) Stepan Mesıch, Rýmynııa Prezıdenti Ion Ilıeský, Tatarstan Respýblıkasynyń tuńǵysh Prezıdenti Mıntımer Shaımıev, Sıngapýr 1-shi premer-mınıstri Lı Kýan Iý, Túrkimenstan prezıdenti Gýrbangýly Berdymýhamedov, Slovakııa Prezıdenti (2007) Ivan Gashparovıch, Vengrııa Prezıdenti (2007) - Laslo Shoıom, FIFA prezıdenti Iozef Blatter, RF Prezıdenti Ákimshiliginiń basshysy Sergeı Ivanov, qarý qurastyrýshy Mıhaıl Kalashnıkov, baletmeıster Iýrıı Grıgorovıch, KSRO Halyq ártisi Iosıf Kobzon jáne basqa tanymal tulǵalar bar.