Almas Ahmetbek, aqyn
«Kók týdyń jelbiregeni» alǵashynda, shaǵyn óleń bolyp jazyldy. Táýelsizdiktiń qarsańynda biz áli qıyr jaılap, shet qonyp júrgenbiz. «Elim» dep ótken Asqar Jakýlın esimdi ultjandy, isker baýyrym bar edi. Sol baýyrym dúnıeden qaıtarda ósıet qaldyrypty. О́sıetinde eki-aq nárse aıtypty: «Men dúnıeniń barlyq buryshyn araladym. О́zim úshin kóp keremetter taptym. Baı boldym, baqytty boldym. О́mirime rızamyn. Men úshin dúnıedegi eń uly oqıǵa – Qazaqstannyń táýelsiz memleket bolǵany. Al meniń ómirimdegi eń uly sheshim – Qazaqstanǵa qonys aýdarýym», depti. Asqar baýyrym aıtqandaı, ómirimizdegi eń uly sheshimdi jasap, 1993 jyly azattyqtyń on tórtinshi aıynda alǵash ret týǵan elimniń topyraǵyna tabanym tıgende, Qorǵas beketinen jelbiregen Týymyzdy kórdim. Týdyń qudireti júregimdi sharpyp ótkendeı boldy. Adamdardyń asqaq sezimin aspannan aǵyl-tegil shashyp, memlekettiligi bar el ekenin meńzep turǵan talaı jurttyń jelbirep turǵan jalaýyn kórip júrmiz, biraq sol sátte kóz aldymda turǵan tý men úshin basqa edi. Aqynda aıaqasty keletin alaquıyn sezim, shalqyp keletin shabyt degen bolady. Tap sol sátte tý maǵan ǵana arnap til qatyp turǵandaı kórindi. Sondaı kóńil-kúıdiń áserimen jazylǵan óleńniń alǵashqy shýmaǵy: Kók týdyń jelbiregeni Baqyttyń eljiregeni, Qıyrda qalǵan qazaqtyń Ata jurtyna jete almaı Kóziniń móldiregeni, – dep órildi. Keıin sahnadan oqyǵan kezimde jarq etip, jaı túsirip ótetindeı otty óleń bolǵanyn sezinip júrdim. Keıin elimizdegi tanymal sazgerler bul óleńge ánder jaza bastady. О́zimniń de qolyma dombyra alyp, án salatyn ádetim bar. Biraq meniń júregimdi jaryp shyqqan óleńmen bul ánderdiń qaýyshýyna kóńil tolmady. Sóıtip, ózimmen jany syrlas aqyn, ózi sazger, ózi ánshi Ermurat Zeıiphandy shaqyryp alyp, «osy óleńge major yrǵaqtaǵy keń tynysty, patrıottyq rýhtaǵy án jazaıyqshy» degen usynysymdy aıttym. Ermurat óte talantty jigit edi, eki kúnniń ishinde eki nusqadaǵy án jazyp alyp keldi. Ekeýi de major, ekeýi de dıapazony keń daýysqa arnalǵan. Balalarymnyń bári de mýzyka mektebinde oqıtyndyqtan, úıde eki fortepıano turatyn. Ermurat Zeıiphan jazyp ákelgen ánderdiń ekeýin de kúısandyqta oınap berdi, ekinshi áýeni qazir esimde qalmady, sóıtip, búgingi kúni el aýzyndaǵy júrgen nusqasyn tańdadyq. Áýenniń keı jerine óleńge beıimdep, azdap ózgeris engizdik. Sońynan Ermuratpen birge balalarym da, zaıybym da, ózim de qosylyp, eki saǵattaı osy ándi shyrqadyq.
Án Ermurat Zeıiphannyń da kóńilinen shyqty, tý týraly mýzykalyq tolǵanysy týǵannan keıin ózi de talaı ýaqytqa deıin qýanysh qushaǵynda júrdi. Eki fortepıanonyń bireýin baýyrymnyń eńbegi úshin baıǵazyǵa berdim. Sol tartýym Ermurattyń úıinde áli tur. Ol án jaryqqa shyqqan soń on jyldan keıin dúnıeden qaıtty. Biraq alǵashqy jyldary bul án qazirgideı tanymal bola almady. Alǵashynda án belgili opera ánshisi Maıra Muhamedqyzynyń lırıkalyq soprano daýsymen oryndalǵan bolatyn. Qorǵanys mınıstrligi ansambliniń ánshisi bolyp júrgende Ermurat Zeıiphannyń ózi de oryndady, Elbasynyń aldynda da shyrqady. Biraq bul ánniń baǵy London Olımpıadasynan keıin ashyldy. Sol jyly dúrkin-dúrkin jeńiske qol jetkizgen sportshylarymyz tuǵyrǵa kóterilip, teledıdardan shyrqalǵan saıyn qazaqy namys, memleketshildik, ulttyq rýh ánmen birge tógildi. Ár qazaqtyń aıtqysy kelgeni osy óleń joldaryndaǵy sóz bolyp shyǵa keldi. Áni men sózi qaýyshyp, kóptiń júregine qona ketti. El aǵalarynyń biri úlken jıynda turyp: «Ermurat ekeýiń osy ánderiń arqyly qazaq halqynyń rýhynda patrıottyq tóńkeris jasadyńdar», degen edi. «Kók týdyń jelbiregeni» ániniń jalpyhalyqtyq án bolyp ketýinde, árıne, Ibragım Eskendir baýyrymnyń eńbegi zor. О́zi aranjırovkasyn jasap, ánniń tabıǵatyn estradaǵa beıimdep, dombyra men syrnaı únin qosyp oryndaǵany, rasynda da, júrekke jyly tıip, jańalyq bolyp qabyldandy. Basqa oryndaýshylardy aıtpaǵanda, Qazaqstanda 10 000-daı mektep bolsa, sol mektepterdiń bar oqýshysy jany qalap jappaı oryndaıtyny ánniń elin, jerin, ultyn, Otanyn súıýge úndeıtin qýatqa ıe ekenin bildirse, ony estigen saıyn kóńilim marqaıady. «Kók týdyń jelbiregeniniń» patrıottyq rýhtaǵy jigerli jyrlardyń qataryn tolyqtyrǵanyna óleń avtory retinde qýanamyn.
ALMATY