Innovasııalyq yntymaqtastyq ulǵaımaq

Almatyda TMD elderi Ekonomıkalyq keńesiniń kezekti 51-shi otyrysy bolyp ótti. Keńeıtilgen kezdesýdiń jumysyna Premer-Mınıstrdiń birinshi orynbasary О́mirzaq Shókeev qatysyp, sóz sóıledi. Jıynda negizinen alǵanda, TMD elderiniń ekonomıkalyq yntymaqtastyǵyn damytyp, ony odan ári jetildirý máselelerine qatysty is-sharalar jan-jaqty talqylandy. Aýqymdy júzdesýdegi eń basty áńgime TMD-ǵa qatysý­shy-memleketterdiń 2020 jylǵa deıingi kezeńge arnalǵan ın­no­va­sııa­lyq yntymaqtastyq jó­nin­­degi memleketaralyq baǵdar­la­ma­synyń jobasy tóńireginde órbi­di. Sonymen qatar, TMD-ǵa qaty­sýshy-memleketterdegi va­lıýta­lyq retteý jáne valıý­ta­lyq ba­qylaý salasyndaǵy saıa­sattyń negizgi erejeleri, qaǵı­dalary tý­raly kelisimniń jo­basy, sondaı-aq erkin saýda aı­maǵy kelisim-shartyna qatysty jáıtter de nazardan tys qalǵan joq. TMD elderi ekonomıkalyq ke­ńesiniń 51-otyrysynyń kún tár­tibinde birqatar salmaqty máse­leler qoıylyp,  qarastyryldy. Máselen, jıynǵa qatysýshylar basqosýda TMD Ekonomıkalyq damýy strategııasynyń (2009-2011 jyldar) alǵashqy kezeńin júzege asyrý boıynsha atqa­ryl­ǵan is-sharalar josparynyń oryndalý barysyn saraptaýmen aınalysýdy da uıǵaryp otyr. Sonymen birge Táýelsiz Memleketter Dostastyǵy elderi kólik dálizderin úılestirý komıteti tártibiniń jobasyn talap deń­geıinde talqylaý da oıda bar. Keńeıtilgen otyrys barysynda TMD-nyń normatıvtik-quqyqtyq qujattaryna birqatar ózgerister de engizilmek. Reseı Federasııasy, Ýkraına, Belarýs, Qazaqstan, Ázerbaı­jan, О́zbekstan, Túrkimenstan, Tájikstan, Qyrǵyzstan, Armenııa, Moldova memleketteri dele­gasııalary qatysqan Ekono­mı­kalyq keńestiń 51-otyrysynda sóz alǵan TMD Atqarý komı­tetiniń tóraǵasy – atqarýshy hat­shy Sergeı Lebedev óz sózinde TMD memleketteriniń ekonomı­ka­lyq ózara tyǵyz baılanysy men yntymaqtastyǵyn odan ári arttyrý tóńiregindegi jáıtterge toqtaldy. – Shyn mánisinde de, búgingi tańdaǵy kópshilik nazaryn aýda­ryp otyrǵan eń basty máse­le­ler­diń biri – TMD elderiniń eko­no­mıkalyq ózara is-áreketin úıles­tirýdi tereńdetý ekendigi aıtpasa da túsinikti. Al, mundaı aýqymdy is-shara árbir memlekettiń, eń al­dymen, sharýashylyq jáne ǵy­ly­mı-tehnıkalyq qýatyn barynsha tıimdi paıdalaný múmkindigine qol jetkizbek. Sonymen qosa, álemdik qarjy daǵdarysynan týyn­dap otyrǵan qaýip-qater­ler­ge qarsy birlesken kúsh-jigerdiń bereri mol ekendigi sózsiz. Dos­tastyqqa enetin memleketterdiń basshylary TMD aıasyndaǵy eko­nomıkalyq ózara qarym-qatynas máselelerine turaqty kóńil bó­lýde. Munymen qosa Memleket basshylary TMD ekonomıkalyq damýynyń 2020 jylǵa deıingi strategııasy negizindegi ekono­mı­kalyq yntymaqtastyqty nyǵaı­typ, tereńdetý jáne odan ári jetildirýge de eleýli úles qosýda. Dostastyq memleketteri basshy­lary bıylǵy jyldyń qyrkúıek aıynda TMD-nyń qurylǵanyna 20 jyl tolýyna oraı málimdeme qabyldady, – dedi Sergeı Lebedev. TMD Ekonomıkalyq keńesiniń 51-otyrysynda «ekonomıkalyq keńestiń qashanda kópjaqty ózek­ti máseleleriniń naqty sheshimin tabýda jáne tıimdi keńester almasyp, tájirıbe almasý maq­sa­tyndaǵy kómegi mol ekendigi» atap kórsetildi. Premer-Mı­nıstrdiń birinshi orynbasary О́mir­zaq Shókeevtiń bul tujy­ry­myn keńeske qatysýshylar da tolyqtaı qoldaıdy. – Kópshilikke belgili, Qazaq­stannyń ekonomıkasy ýaqyt ót­ken saıyn qarqyn alyp, áleý­mettik ahýal da jaqsara túsýde. Atap aıtarlyǵy, Qazaqstanda jı­yrma jylda IJО́ 700 dollardan-10000 dollarǵa deıin ósti. Al, IJО́-niń kólemi 2015 jylǵa qaraı 15000 dollarǵa jetpek. TMD elderimen ekonomıkalyq ın­tegrasııa bizdiń elimizdiń Eýropanyń damyǵan elderiniń qa­taryna kóterilýine kómek­tes­pek. Jıynnyń kún tártibine qoı­yl­ǵan barlyq máseleler boıyn­sha tıisti sharalar qabyldandy, sondaı-aq qosymsha is-sharalar da nazardan tys qalǵan joq, dedi О́mirzaq Shókeev. Bútindeı alǵan­da TMD Ekonomıkalyq keńesiniń kezekti 51-shi otyrysy jumy­sy­nyń qorytyndysy tabysty aıaq­taldy dep túıin jasaýǵa bolady. Kezekti basqosý Máskeý qala­syn­da bıylǵy jyldyń jeltoqsan aıynda ótkizilmek. Baqyt BALǴARINA, Almaty.