Qurmetti otandastar! Barshańyzǵa qasıetti ramazan aıynyń qarsańynda jyl saıynǵy dástúrli úndeýimdi joldaımyn! О́zderińizge belgili, elimizdiń Aqtóbe, Aqmola, Soltústik Qazaqstan oblystaryndaǵy otandastarymyz aıtyp kelmeıtin tabıǵı sý tasqynynan edáýir zardap shekti. Qanshama baýyrlarymyzdyń úıi sý astynda qalyp, materıaldyq shyǵynǵa ushyrady. Osyǵan oraı, jomart jandar men qaıyrymdy kásipkerler tabıǵı apattan úı-kúısiz sharasyz qalǵan turǵyndarǵa qoldaý kórsetip, kómegin aıamaýda. Qazaqstan musylmandary dinı basqarmasy da janashyr jamaǵattyń demeýshiligimen «Qaıyrymdylyq kerýeni» aksııasy aıasynda kıim-keshek, azyq-túlik, turmysqa qajetti buıymdar jetkizdi. Kásipker azamattardy osy baǵyttaǵy qaıyrymdylyq jumystarǵa belsene atsalysýǵa shaqyramyn.
Qadirli baýyrlar! Asyl dinimiz Islamda «sadaqa jarııa» degen qasıetti uǵym bar. Qoǵamnyń, halyqtyń ıgiligi úshin jasalǵan saýapty isterdi, atap aıtqanda, meshit-medrese, aýrýhana, balabaqsha, sport keshenderin turǵyzý, kóshe, kópir salý, aýyzsýy joq aýyldarǵa sý tartyp, qudyq qazdyrtý, t.b ıgi amaldardy «sadaqa jarııa» dep ataımyz. Mine, bul izgi is-sharalar halyqtyń ıgiligi úshin jasalǵan saýapty amaldar. Qazaqstan musylmandary dinı basqarmasy oblystarda «Qaıyrymdylyq mekemesin» ashyp, jergilikti jas býynǵa dinı hám zaıyrly bilim berip, ımandylyqqa tárbıeleýmen qatar, turmysy tómen otbasylaryna áleýmettik kómek kórsetýde. Mesenattar men kásipker azamattardy jalpy jurtshylyqqa qajetti nysandardy turǵyzý jumysyna belsene aralasyp, janashyrlyq tanytýǵa shaqyramyn. О́ıtkeni, ramazan – qaıyrymdy jandar úshin mol múmkindikter maýsymy. Orazada jasalǵan árbir qaıyrly is – úlken saýap. Birde paıǵambarymyz Muhammedten (oǵan Allanyń salaýaty men sálemi bolsyn) bir kisi: «Ýa, Allanyń Elshisi, eń jaqsy adam kim?» – dep suraǵanda, ol: «Eń jaqsy adam – qoǵamǵa, elge paıdasy tıgen pende», – dep jaýap bergen eken. Jýyrda Elbasymyz Nursultan Nazarbaev elimizdegi baı-dáýletti azamattardy jaǵdaıy tómen turǵyndarǵa kómek kórsetýge úndedi. Memleket basshysynyń bul bastamasyna ún qosý barshamyzdyń azamattyq boryshymyzǵa aınalýy qajet dep esepteımin.
Qurmetti qazaqstandyqtar! Qoǵamda kisi aqysyn jeý, balany aıaýsyz urý, pedofılızm, náresteni dalaǵa tastaý, óz-ózine qol jumsaý, ajyrasý, keıbir azamattar arasyndaǵy qatygezdik jaǵdaılar, araq-sharapqa táýeldilik, otbasyndaǵy kelispeýshilik, terrorlyq oqıǵalar syndy jalpy adamgershilik qundylyqtarǵa jat áreketter kórinis tabýda. Pendeni rýhanı turǵydan azdyryp, eldiń tynyshtyǵyn buzyp, qorshaǵan orta men búkil qoǵamnyń tutastyǵyna úlken zııanyn tıgizetin mundaı jaman áreketterge jurt bolyp jumylyp qarsy kúresýimiz kerek. Búgingideı birligimizdiń arqasynda mundaı jaǵymsyz, jaman oqıǵalardyń jolyn kese alamyz.
Ardaqty aǵaıyn! Ramazan – mol saýap jınaıtyn qasıetti aı. Adam balasy izgi amaly arqyly Jaratýshynyń raqymyna, nyǵmetine keneledi. Jomart, janashyr azamattardy, kásipkerlerdi kómekke muqtaj adamdarǵa qamqorlyq kórsetýge, tabıǵı apat saldarynan buzylǵan úılerdi jóndeýge, jetim men jesirge meıirimdilik tanytyp, qaraýsyz qalǵan qarttarǵa kóńil bólýge shaqyramyn. Zeket berý – jaǵdaıy kelgen (sharıǵat boıynsha nısap mólsherine jetken) musylmanǵa paryz. Al zeket berekeli ramazan aıynda berilse, onyń da saýaby eselenip jazylady. Qasıetti aıdyń qurmeti úshin azyq-túlik, kókónis pen turmystyq zattarǵa jeńildik jasalyp, Qudaıy astar men sadaqalar aýyzashar ýaqytynda uıymdastyrylsa, toılar ishimdiksiz ótkizilse, jamandyqtyń bastaýy bolǵan araq-sharaptyń satylýyna barynsha jol berilmese degen tilegimdi bildiremin. Osynaý jaqsy amaldar ramazannan keıingi aılarda da jalǵasyn tapsa nur ústine nur. On eki aıdyń sultany bolǵan qasıetti ramazanda jasaǵan amaldarymyz ben izgi nıetterimizdi Alla taǵala qabyl etkeı! Elimiz aman, jurtymyz tynysh, táýelsiz elimizdiń bolashaǵy jarqyn, árbir ıgi bastamalarymyz baıandy bolǵaı! Áýmın!