Atyraýda ishki memlekettik aýdıt komıteti júıeli jumys júrgizýde

«Memlekettik aýdıt jáne qarjylyq baqylaý týraly» QR zańy qoldanysqa engennen beri ishki memlekettik aýdıt komıtetiniń organdarynda komplaens-baqylaý júzege asyryla bastady. Bıyl baqylaýmen qamtylǵan 1 784 mln teńgeniń ishinen somasy 244,1 mln teńge quraıtyn buzýshylyq táýekelderi rastalǵan. Osyǵan oraı 15 laýazymdy tulǵaǵa tártiptik jaza qoldanyldy. Al qujatqa baılanysty qatelik jibergen eki laýazymdy tulǵa 816 myń teńge aıyppul tóledi.  «Sybaılas jemqorlyqqa qarsy is-qımyl Ulttyq bıýrosynyń departamentine jalpy somasy 41,0 mln teńgege 3 aýdıt materıaly joldandy. Tártiptik jaýapkershilikke 159 laýazymdy tulǵa tartyldy, – deıdi E.Maraıymov. – Mysaly, «Keń Jylyoı» Mádenıet úıi» 2016 jyly Úkimet rezervinen «Jumyspen qamtý – 2020» Jol kartasy» baǵdarlamasy boıynsha bólingen bıýdjet qarajatynyń paıdalanylýyna júrgizilgen aýdıt qorytyndysynda 30,8 mln teńgeniń buzýshylyqtary anyqtalǵan. Qarjylyq buzýshylyqtar tolyqtaı qalpyna keltirildi. «Keń Jylyoı» Mádenıet úıiniń» dırektory 226,9 myń teńge somaǵa ákimshilik jaýapkershilikke tartyldy. Sondaı-aq, Atyraý qalalyq bilim bólimine júrgizilgen aýdıt is-sharasy qorytyndysymen jetkizilmegen taýarǵa bıýdjetten 9,3 mln teńge negizsiz aýdarylǵany belgili boldy. Aýdıt materıaldary Sybaılas jemqorlyqqa qarsy is-qımyl Ulttyq bıýrosynyń departamentine joldanǵan».  Departament jyl basynan beri 7437 memlekettik satyp alý rásimine kameralyq baqylaý júrgizdi. Qortyndysynda 579 memlekettik satyp alý boıynsha somasy 10325,4 mln teńgeniń buzýshylyqtary anyqtalypty. Qurylym basshysy memlekettik satyp alýdy júzege asyrý barysynda satyp alý qatysýshylaryna zańnamada kózdelmegen talaptardy belgileý, shartty jeńildikti quqyqqa syıymsyz qoldaný, áleýetti ónim berýshilerdi quqyqqqa syıymsyz qabyldamaý jáne negizsiz konkýrsqa jiberý syndy qatelikterge kóp jol beriletinin aıtady. Memlekettik satyp alý uıymdastyrýshylarymen Qurmanǵazy, Inder, Jylyoı aýdandarynyń jalpy bilim beretin orta mektepterine ınformatıka, geografııa, mýltımedııalyq kabınet jáne basqa da kabınetterdi satyp alýda konkýrstyq qujattamany jasaqtaý barysynda zań normalary saqtalmaǵan. Baqylaý qorytyndysymen 23 memlekettik satyp alýdyń kúshi joıyldy. Memlekettik satyp alýdy uıymdastyrýshy, «Jylyoı aýdandyq turǵyn úı kommýnaldyq sharýashylyǵy, jolaýshylar kóligi jáne avtomobıl joldary bólimi» MM Maıkómgen, Shoqpartoǵaı, Turǵyzba, Qosshaǵyl aýyldarynyń ishki joldaryn jańǵyrtý boıynsha jobalaý-smetalyq qujattamany jasaqtaýda Zańnyń 9-tarmaǵyn buzyp, konkýrstyq qujattamada jobalaý qyzmetin atqarýǵa áleýetti ónim berýshiniń lısenzııasy bolýy týraly talap qoıylmaǵan, sondaı-aq jobalaý-smetalyq qujattama jasaqtaý jumysyna dempıngtik baǵa qaralmaǵan. Bul satyp alýdyń da kúshi joıyldy.  «Konkýrstyq ótinimderdi qaraý kezinde áleýetti ónim berýshilerdi negizsiz konkýrsqa qatysýǵa jiberý derekteri de kezdesedi. Aıtalyq, satyp alý uıymdastyrýshysy, «Jylyoı aýdandyq qurylys, sáýlet jáne qala qurylysy bólimi» MM №1305312-1 «Jylyoı aýdany Qulsary qalasynda kóshe beınebaqylaýy jáne baǵdarsham ornatýǵa jobalaý-smetalyq qujattama jasaqtaý» satyp alýdy júzege asyrý kezinde zań normalary men ereje talaptary buzylyp, áleýetti ónim berýshiniń biliktilik talaptaryna jáne konkýrstyq qujattama talaptaryna saı kelmeıtin konkýrstyq ótinimin konkýrsqa qatysýǵa jibergen. «Qulsary qalasy ishki ister bóliminiń jedel basqarý ortalyǵy ákimshilik ǵımaratynynyń qurylysyna tehnıkalyq qadaǵalaý qyzmeti» konkýrsy boıynsha komıssııa biliktilik talaptaryna saı kelmeıtin «Kurylys Injınırıng Aqtóbe» JShS-nyń ótinimi negizsiz konkýrs jeńimpazy bolyp tanylǵan» – deıdi Ishki memlekettik aýdıt departamenti basshysy.  Ekonomıkalyq quqyq buzýshylyqtardyń aldyn alý baǵytynda departament barlyq aýdandarda memlekettik satyp alý máseleleri boıynsha tehnıkalyq oqýlar ótkizýdi jolǵa qoıǵan. Bul – atalǵan saladaǵy problemalardyń aldyn alýǵa baǵyttalǵan qadamnyń biri.  Baqytgúl BABASh,  «Egemen Qazaqstan».  ATYRAÝ.