Týyndynyń alǵashqy kórsetilimine mádenıet, saıasat jáne qoǵam qaıratkerleri, zııaly qaýym ókilderi men jýrnalıster qatysty. Shara aldynda Aqparat jáne kommýnıkasııalar mınıstri Dáýren Abaev sóz sóılep, mereıtoı ıesine aqjarma tilegin jetkizdi. «Halqymyz Elbasynyń senimdi serigi, biregeı memleket jáne qoǵam qaıratkeri retinde qadirleıtin Myrzataı Joldasbekov abyz jasty úlken abyroımen baǵyndyryp otyr. Jalpy, onyń ulaǵatty ustaz, parasatty ǵalym, kórnekti jazýshy retinde atqarǵan qyzmetterin jaqsy bilemiz. Atap aıtsaq, ulttyq ádebıetti, ásirese, jyr alyby – Jambyldyń shyǵarmashylyǵyn zertteýge zor úles qosty. Kóne túrki jazbalaryn qazaq ǵalymdary arasynda alǵashqylardyń biri bolyp zerttedi. Ony ulttyq ıdeıaǵa aınaldyrýǵa úles qosty. Dese de, Myrzataı aǵamyzdyń táýelsizdigimizdiń nyǵaıýyna sińirgen eńbegi orasan. Egemendik jyldary Elbasynyń janynan tabylǵan mereıtoı ıesi eldigimizdiń irgetasyn qalaýǵa kóp ter tókti. Halyqqa sózin ótkize alatyn tulǵa bolyp, jurtty birlikke, tutastyqqa shaqyryp keledi. Abyz aqsaqal áli kúnge ulttyq ıdeologııalyq jumystardyń basy-qasynan tabylýda. Qaı ýaqytta da kózdegeni – el múddesi, jurt taǵdyry», dedi mınıstr. Kórsetilim barysynda «Habar» agenttigi» AQ basqarma tóraıymy Almagúl Ahmetjanova jyly lebizin bildirip, gúl shoqtaryn tabys etti. Ol Myrzataı Joldasbekovtiń derbestik jolyndaǵy saıası, rýhanı dúnıeleriniń esepsiz ekenin aıtyp, áli de attan túspeýin tiledi. Basqosýda Parlament Májilisiniń depýtaty, mereıtoı ıesiniń shákirti ári qyzmettes bolǵan Saýytbek Abdrahmanov derekti fılmge oń baǵasyn berip, tartymdy estelikterimen bólisti. «Myrzekeńniń otyz jasynda qorǵaǵan kandıdattyq dıssertasııasynyń ár jaǵynda úlken-úlken saıası sebepter bolǵan. Solardyń bireýi orys halqynyń mańdaıyna basqan murasy – «Igor jasaǵy týraly jyrdyń» dúnıege kelgen ǵasyryna qatysty. Ol zamanda bizdiń ádebıetimiz sizdiń ádebıetińizden erte shyqqan, bizdiń ata-babalarymyz sizdiń ákelerińiz jasamaǵan eposty jasaǵan, sizder áripti oımalaǵan kezde álipbıi, jazýy bolǵan, sol jazýdy tasqa qashap túsirgen degen oıdy aıtý. Muny aıtýǵa ǵana ońaı. Mine, qazaq ádebıetin on eki ǵasyrǵa ári jyljytyp bergen jan aramyzda otyr. Sol arqyly biz Tonykók, Bilte qaǵandardyń zamanyndaǵy erlikpen, eldikpen tárbıelendik. Sol muranyń bizge ortaq ekenin sezindik, maqtandyq. Sol arqyly otandyq túrkologııadaǵy jalymyz kúdireıip shyǵa keldi. Sol arqyly Halyqaralyq Túrki akademııasy seksen mıllıon halqy Túrkııada emes, on segiz mıllıon halqy bar Qazaqstanda oryn tepti. О́ıtkeni, Maǵjan aıtqandaı, «Kóp túrki enshi alyp tarasqanda, Qazaqqa qara shańyraq qalǵan joq pa». Sol qara shańyraqtyń qasıetin dáleldegen adam retinde biz Myrzekeńe bas ıemiz», dedi depýtat. Sharany túıindegen mereıtoı ıesi kópshilikke alǵysyn jetkizip, kınotýyndyǵa rızashylyǵyn bildirdi. «Biz bastaýysh mektepti jetistirmesek te, dalanyń akademııasynan sýsyndadyq. Sonyń ózinde Ábish Kekilbaevqa, Dýlat Isabekovke, ózge de el aldyndaǵy kóptegen azamattarǵa sabaq berdim. Sondyqtan da óte baqytty adammyn», degen mereıtoı ıesi ónegeli ómir jolynan syr tarqatty.
Ashat RAIQUL, «Egemen Qazaqstan»