Qordaıda Saǵadat Nurmaǵambetovke arnalǵan eskertkish ashyldy

Saǵadat Qojahmetuly Qazaqstan Respýblıkasynyń tuńǵysh Qorǵanys mınıstri retinde de egemen eldiń aıbyndy áskerin qurýǵa úlken úles qosty. Táýelsiz memlekettiń tuńǵysh Halyq qaharmany retinde de esimi tarıhqa altyn árippen jazyldy.  Aty ańyzǵa aınalǵan tulǵa Saǵadat Nurmaǵambetovtiń ómir joly ónegege toly. Otan úshin ot keshken azamat beıbit zamanda da ulttyń damýy jolynda eńbektendi. Sondyqtan ózi ómirden ótse de týǵan halqy batyryn umytpaı, jadynda tutyp keledi.  Qordaı aýdany, Gvardeısk qalashyǵynyń ortalyǵynan saıabaq jáne batyrǵa arnalǵan bıýst ashyldy. Aıtýly sharaǵa Qazaqstan Respýblıkasy Qorǵanys mınıstriniń birinshi orynbasary, Qazaqstan Respýblıkasy Qarýly Kúshteri Bas shtabynyń bastyǵy, general-leıtenant Murat Maıkeev, Halyq qaharmany, Parlament Májilisiniń depýtaty, general-leıtenant Baqytjan Ertaev, tuńǵysh Qorǵanys mınıstriniń orynbasary bolǵan general-leıtenant Fedor Sherbakov jáne ózge de generaldar men ofıserler qatysty. Sondaı-aq aýdan ákimi Bolatbek Baıtóle, Qazaqstan Respýblıkasy Qarýly Kúshteriniń ardagerleri men aýyl aqsaqaldary da bolyp, ardager azamatty bir mınýt únsizdikpen eske aldy.  Budan keıin saltanatqa arnaıy qatysqan general-leıtenant Murat Maıkeev sóz alyp, ardaqty azamat týraly oıyn bildirdi.  «Saǵadat Nurmaǵambetov ózin tutastaı Otanǵa qyzmet etýge arnaǵan naǵyz patrıot adam edi. Qazaqstan Respýblıkasy Qarýly Kúshteri Joǵarǵy Bas qolbasshysynyń jetekshilik etýimen ol zamanaýı Qarýly Kúshterdiń irgesin qalady. Qazaqstannyń tuńǵysh Qorǵanys mınıstri, Uly Otan soǵysynyń ardageri, Keńes Odaǵynyń batyry, tuńǵysh Halyq Qaharmany, armııa generaly Saǵadat Qojahmetuly el úshin kúrmeýi qıyn kezeńde áskerdi basqara otyryp, onyń qalyptasýy men damýyna baǵa jetpes úles qosty. Onyń esimi Táýelsiz Qazaqstannyń tarıhynda altyn áriptermen jazylyp, halqynyń jadynda máńgige saqtalmaq», – dedi M.Maıkeev.  Sondaı-aq, general-leıtenant Fedor Sherbakov ta óz sózinde Saǵadat Nurmaǵambetovtiń Qazaqstan áskerin qurýdaǵy erekshe rólin, adaldyǵy men eńbekqorlyǵyn áńgimeledi. «Men eki akademııany támamdadym, al Saǵadat Nurmaǵambetovten alǵan tálimimdi men úshinshi uly akademııa dep esepteımin», dep júrekjardy lebizin jetkizdi.  Sonymen qatar, Saǵadat Nurmaǵambetovtiń qurmetine arnalǵan saltanatty jıynǵa Qazaqstan Respýblıkasynyń Qyrǵyzstandaǵy Tótenshe jáne ókiletti elshisi Aıymdos Bozjigitov jáne armııa generalynyń úzeńgiles dosy, Qyrǵyzstan Respýblıkasy Qarýly Kúshteriniń tuńǵysh mınıstri, general-polkovnık Myrzakan Sýbanov qatysty. Áriptesteri atynan sóz alǵan qurmetti qonaq óziniń áskerı ustazy jaıly áńgime qozǵap, Saǵadat Qojahmetulynyń Qyrǵyz áskerleriniń de tabanynan tik turýyna da óz septigin tıgizgenin, onyń ár basqan qadamy jastarǵa ónege bolyp otyrǵanyn aıtty.  Kelesi kezekte Saǵadat Nurmaǵambetovtiń qyzy Aısulý Nurmaǵambetova sán-saltanaty jarasqan saıabaq ashyp, eskertkish ornatqany úshin sharanyń uıymdastyrýshylary men 40-shy «Otar» áskerı bazasynyń basshylyǵyna alǵysyn aıtsa, saltanatty jıyndy qorytyndylaǵan Halyq Qaharmany Baqytjan Ertaev aty ańyzǵa aınalǵan abyz tulǵany eske alyp, esteligimen bólisti.  «Saǵadat Nurmaǵambetovtiń esimi máńgige bizdiń júregimizde saqtalady. Ol mundaǵy turǵan barlyǵymyzdyń aǵamyz, ákemiz, aqylshymyz. Onyń ár aıtqan sózi ósıet edi. Biz ardagerler onyń rýhyna bas ıemiz», – dedi halyq qalaýlysy óz sózinde.  Hamıt Esaman,  «Egemen Qazaqstan».  Jambyl oblysy