Ol Forým aıasyndaǵy oı-paıymdar ózara qarym-qatynasty jaqsartýǵa, al únqatysýlar platformasy pikirler men ıdeıalar almasýǵa, tarıhı jáne mádenı aspektiler boıynsha naqty tujyrymdamalardy ázirleýge yqpal etetinine senim bildirdi.
«Mundaı forýmdar óte mańyzy ári ózekti dep oılaımyn. Nege? Sebebi, osy tektes jıyndar ǵalymdardyń bir-birimen yqpaldastyq ornatýyna, búgingi tańda óte ózekti bolyp turǵan máseleler boıynsha pikirtalas uıymdastyrýǵa sep bolady. Bul – óte mańyzdy. Biz ózimizdiń bastaýymyzdy qaıdan alǵanymyzdy jáne qazir kim ekenimizdi bilýimiz úshin júrip ótken jolymyzdy saralap, ekshep otyrǵanymyz jón. Qazaqstan Prezıdenti Nursultan Nazarbaev árdaıym mádenı mura men qundylyqtarǵa negizdelgen jarqyn bolashaqty qurýǵa aıryqsha mańyz berip keledi. Máselen, maǵan Nursultan Ábishulynyń «Bolashaqqa baǵdar: rýhanı jańǵyrý» maqalasynda aıtqan oılary unady. Qazaqstan Prezıdenti ult damýyndaǵy fýndamentaldy tujyrymdamanyń ózegi saıası-ekonomıkalyq jańǵyrýǵa negizdelýi kerek ekenin aıtty. Alaıda, biz mádenıetke jáne ulttyq birtektilik máselelerine de aıryqsha kóńil bólmesek, onda jańǵyrý úderisi de óz deńgeıinde júrmeıtinin umytpaýymyz kerek. Men Nursultan Nazarbaevtyń bizdiń óz ótkenimizdi, órkenıetimizdi tanyp-bilmeı, jańǵyrýdyń jaı sóz kúıinde qalatyny tóńireginde aıtqan oıyn da quptaımyn. Jahandaný zamanynda barlyq órkenıetter bir-birimen baılanys ornata otyryp, qozǵalysta bolýy kerek. Bul árqaısymyzdyń básekege qabiletti bolýymyzǵa da sep bolary anyq. Demek, biz jańǵyrý týraly aıtqanda osyny eskerýimiz kerek», – dedi M. Sýmro. Sondaı-aq, ol kún tártibinde turǵan máselelerdi talaı jyldardan beri erekshe qasterlep kelgen qundylyqtardan bóle-jara qarastyrýǵa bolmaıtynyn, ol úshin zertteýshilerge, onyń ishinde tarıhshylarǵa ǵylym men tehnologııanyń damýyn tejeıtin faktorlarǵa tereń, ári jan-jaqty boılap, saraptama júrgizý úshin úlken múmkindik berý qajettigin atap ótti.
Buǵan qosa, Manzýr Hýseın Sýmro Qazaqstandy BUU Qaýipsizdik Keńesiniń Turaqty emes músheligine saılanýymen quttyqtady. «Bul – jalpy óńir úshin óte jaqsy jańalyq. Al biz, ǵalymdar retinde ǵalamdyq jáne óńirlik damý aıasyndaǵy máselelerdi taldap, talqylaýǵa, saralaýǵa atsalysýymyz kerek», – dedi bul jóninde Ekonomıkalyq yntymaqtastyq uıymy Ǵylym qorynyń (ESO Science Foundation) prezıdenti.
«ESO Science Foundation» – memleketaralyq uıym. Onyń quramynda 10 memleket bar. Qazaqstan da sol elderdiń qatarynda tur. Pákistannyń Islamabadynda ornalasqan uıym negizinen ǵylym, tehnologııa, ınnovasııa máselelerin nazarda ustap otyrady.
Láıla EDILQYZY, «Egemen Qazaqstan»