Jaqynda ǵana Almaty oblysy Alakól aýdany Yntaly aýylynyń 38 jasar turǵyny Rysbek Buǵyseluly tutqıyl ustaǵan júrek talmasynan qaıtys bolǵan edi.
Qolynda kári anasy bar, taban et, mańdaı terimen eńbek etip, úlken bir shańyraqty asyrap otyrǵan arystaı azamattyń aıaq astynan kelgen qazasy árıne aýylymyzǵa, ásirese marqumnyń otbasy, týys-týǵandaryna ońaı tıgen joq.
Torqaly toı bolyp, topyraqty ólim shyqqan otbasyna taıly-taıaǵy qalmaı jınalyp, sharýasyna kómektesip, kóńil járdem, qol járdemin aıamaıtyn aýyl adamdary bul joly da josynnan jańylǵan joq. Tiri adamǵa tirshilik. Qasıetti Ramazan aıynyń alǵashqy kúnderimen aralasa kelgen egin egý, jer jyrtý jumysy kezinde Mádenbek, Bulǵynbek, Muqııat bastaǵan aýyl azamattary bas bolyp temir tehnıkany eń aldymen Rysbek marqumnyń jerine saldy. 30-dan asa adam men 20 shaqty tehnıkanyń kúshi jumyldyrylyp, jerin jyrtyp, tuqymyn seýip berdi. «Tirliktiń dıirmenin birlik tartady» degen osy.
«Biz ejelden qaraly úıge qaraılasqan qazaqpyz ǵoı, kimniń basynda qandaı jaǵdaı bolady, Alla biledi. Osyndaı jaǵdaıda bir-birimizdiń qasymyzdan tabylyp, septespesek bir aýyl bolyp otyrǵanymyzdyń qandaı paıdasy bar?» deıdi aýyl turǵyny Bulǵynbek Qojaqapanuly.
Bul – bereke! Endi bir jaǵynan jylaǵandy jubatyp, jyǵylǵandy súıeıtin ata dástúr, ardaqty saltymyz. Eshqandaı ákimshiliktiń arnaıy uıymdastyrýynsyz-aq aptap ystyqta atyz basyna kelgen aýyl adamdarynyń kópshiliginiń aýyzdary oraza. Qashanda úlkenge qurmet, kishige izet jasap júretin aq kóńil, ashyq jarqyn azamattyń aǵaıyn týysynyń basyna túsken qara taýdaı qaıǵysyn bólisip, tirligine septesken bul qaırymdylyq shara, saýapty isteri kópke úlgi bolsa kerek.
Qadyrsultan Núsipqan
Alakól aýdany Yntaly aýyly