Mádenıet jáne sport mınıstrliginiń tapsyrysy boıynsha túsirgeli otyrǵan jańa fılm balýan, ánshi ári kompozıtor Balýan Sholaqtyń ómiri týraly baıandaıdy. Qorǵalym barysynda fılm rejısseri Nurgeldi Sadyǵulov «Qazaqfılmniń» saraptamalyq keńes múshelerine túsirilim tobyn tanystyryp, túsirilý jumystary júretin aımaqtardy atap, shyǵarmashylyq josparlaryn jarııa etti. Buǵan deıin birqatar derekti týyndylar men «Oıynshyqtar», «Sút», «Nesıege mahabbat», «Zulmat», «Bizdiń aýyl – vo!» syndy kórkem fılmderdi túsirip, tájirıbe jınaqtaǵan jańa kartınanyń rejısseri: «Sońǵy serilerimizdiń biri Balýan Sholaq – attyń qulaǵynda oınaǵan jaýjúrek adam. Balýandyǵymen qosa kompozıtorlyǵy bar dala daryny. Fılmde Balýan Sholaqtyń boıynda bar ónerin, eliniń qamy úshin túrli erlikke bara alatyndyǵy men Ǵalııaǵa degen mahabbatyn kórsetkimiz keledi», deıdi. Derekti kıno jáne televıdenıe rejısseri retinde tanylǵan Nurgeldi Sadyǵulov jazýshy Dýlat Isabekovtiń shyǵarmashylyǵyna qanyq deýge bolady. Ol túsirgen derekti fılmder qatarynda «Isabekov álemi» de bar. Sonymen, túsirilim jumystary Aqmola jáne Pavlodar oblystarynda ótedi. Birqatar kadrlar «Qazaqfılm» pavılondarynda túsirilmek. Fılmniń qoıýshy sýretshisi Erkin Súleımenov fılmniń negizgi kórinisteri «Jármeńke» jáne «Balýan Sholaqtyń aýyly» dekorasııalary Almaty oblysy, Jalańash jáne Kegen aýyldarynda turǵyzylatynyn aıtady. Osy arada Balýan Sholaqtyń róline rejısser tańdaýy eńseli akterlerimizdiń biri Erkebulan Daıyrovqa túskenin aıta ketý kerek. Fılmge elimizdiń basqa da tanymal teatr akterlerimen qatar jas talapkerler de túsetin bolady.
Aınash ESALI, «Egemen Qazaqstan»
ALMATY