Oblys aýmaǵy 14 mıllıon 430 myń gektar alqapty alyp jatyr, al onyń 4 mıllıon 430 myń gektary orman qorynyń jerleri bolyp sanalady. Orman qorynyń 2 mıllıon 234 myń gektaryna aǵash egilgen. Sonymen birge, 10 mıllıon 489 myń gektardan astam jerdi aýylsharýashylyq, shabyndyq, egistik jáne jaıylymdyq alqaptar alyp jatyr. Oblystyq tótenshe jaǵdaılar departamentiniń ótken jylǵy taldaýy boıynsha, órtke qarsy erikti qurylymdardyń tıisti tehnıkamen jáne qural jabdyqtarmen jabdyqtalýy men tabıǵı órtterdi sóndirýdegi tájirıbe deńgeıi keıbir aýdandarda áli de tómen. Baǵdat Danılov Talas, Jambyl, Qordaı, Moıynqum aýdandary órtke qarsy erikti qurylymdardy jaýyngerlik kıimmen, baılanys quraldarymen jabdyqtaý jumysyn múldem júrgizbegenin jetkizdi. «Moıynqum, Jýaly, Sarysý aýdandarynda órtti sóndirýge arnalǵan tehnıkanyń sany óte az, shamamen ár aýylda tek qana bir tehnıka bar. Ol buzylǵan jaǵdaıda ony dala órtine paıdalanýǵa múmkindik bolmaıdy. Talas, Baızaq, Jambyl, T.Rysqulov, Shý, Moıynqum jáne Jýaly aýdandaryndaǵy órtke qarsy erikti qurylymdar aspaly órt sóndirgishtermen jabdyqtalmaǵan jáne Baızaq, Merki, Talas, Shý, Moıynqum jáne Sarysý aýdandary órt motopompasymen qamtamasyz etilmegen. Bul kemshilikter erikti qurylymdardyń órt ornyna ýaq- tyly kelmeýine, órttiń úlken aýmaqqa taralýyna áser etedi», − dedi departament basshysy. О́rt – asa qaterli jaý. Sondyqtan da, buǵan beı-jaı qaraýǵa bolmaıdy. Al oblysty basyp ótetin «Batys Eýropa – Batys Qytaı» kólik dáliziniń boıy tal-daraq pen egiske toly. Tasjoldyń qos qaptalyn kómkergen egisti qatań qadaǵaǵa alý qajet-aq. Ara-tura jaýyn-shashyn bolyp turǵanymen, sońǵy kezderi óńirde kúnniń kúrt ysýy oryn alyp otyr. Sondaı-aq, sýǵa shomylý maýsymy da bastalyp ketti. Ásirese, kópshilik Taraz qalasyndaǵy «Zerbulaq» jáne Qarataý qalasyndaǵy «Jartas» kóline, sondaı-aq, Jańatas qalasyndaǵy qalalyq jaǵajaıǵa jıi barady. Odan bólek, óńirde ózen-kól barshylyq. Jýyrda ǵana sýǵa túsý deregi boıynsha oblysta adam ólimi tirkelgen bolatyn. Naqty aıtsaq, 14 mamyr kúni T.Rysqulov aýdany, Kógershin aýylynyń 7-synyp oqýshylary men synyp jetekshileri taý bókterine saıahatqa shyqqan. Saıahattyń sońy qaıǵyly jaǵdaımen aıaqtalyp, «Kógershin» ózeniniń jınalǵan sýyna abaısyzda qulap ketken 2004 jyly týǵan Aǵybaı Qaryntaı men Erbol Nurbek sýǵa batqan. Oblystyq bilim basqarmasynyń basshysy Sulýshash Qurmanbekova bul máselege áýeli ata-analardyń jaýapsyzdyǵy sebep bolǵanyn aıtty. «Balalardyń synyp jetekshilerimen taýǵa saıahattap ketkenin mektep dırektory da, onyń orynbasary da bilmegen. Tipti, balalardy synyp jetekshileri taýǵa júk kóligimen aparǵan. Bul eshqandaı talapqa saı kelmeıdi», deıdi basqarma basshysy. Bul oqıǵadan keıin synyp jetekshisi jumysynan bosatylypty. Qaı kezde de tilsiz jaýǵa tosqaýyl qajet. О́rttiń de, sýdyń da artynda adamnyń taǵdyry tur. Qas-qaǵym sátte qalyń ormannyń ózin kúlge aınaldyryp jiberetin órtpen, jazym bolsa tuńǵıyǵyna tartyp ketetin sýdyń da adam úshin qaýpi basym.
Hamıt ESAMAN,
«Egemen Qazaqstan»
Jambyl oblysy