EKSPO-2017 mamandandyrylǵan halyqaralyq kórmesi qarsańynda Astana qalasynyń IID kóshi-qon qyzmeti basqarmasynyń mamandary sheteldik azamattardyń qujattaryn táýlik boıǵy tártipte tirkeýge alýda.
Vızalyq-kóshi qon portaly jáne e.gov.kz veb-portaly arqyly ýaqytsha tirkeý boıynsha memlekettik qyzmetke qol jetkizý úshin elektrondy kilt alý qajet. Sheteldik azamat qajetti málimetterdi toltyrǵan soń ımmıgrantty elektrondy úlgide tirkeý týraly qujatqa qosymsha paraq beriledi. Ony mindetti túrde basyp shyǵarý qajet.
Budan bólek, basqa memleketterdiń azamattary ýaqytsha tirkelý úshin Máńgilik El dańǵyly, 53, 9 korpýs meken-jaıy boıynsha EKSPO-2017 mamandandyrylǵan halyqaralyq kórmesiniń biryńǵaı qyzmet kórsetý ortalyǵyna habarlasa alady. Munda polısııa qyzmetkerleri qujatty rásimdeıdi, QR vızalyq merzimdi uzartady jáne ımmıgranttardy qabyldaıtyn zańdy tulǵalardy shaqyrta alady.
Jyl basynan beri Astana qalasynyń IID kóshi-qon qyzmetinde 64 myń sheteldik azamat tirkelgen. TMD azamattarynyń jeke tulǵalarda jumys isteýine ruqsat berý boıynsha 14 829 qujat berildi nemese ýaqyty uzartyldy. Eńbek mıgranttarynyń salyq tólemderiniń nátıjesinde qala bıýdjetine 178 mıllıonǵa jýyq teńge tústi. Aǵymdaǵy jyly 623 sheteldik turǵylyqty meken-jaı boıynsha qujat alsa, 784 adam Qazaqstan Respýblıkasynyń azamattyǵyn aldy.
Qala ákimdigi sheteldik azamattardy tirkeý úshin aýdandyq kóshi-qon qyzmetine qosymsha oryndar qarastyrý máselesin sheshti.