«Jýyrda EKSPO ashylady, osyǵan baılanysty Astananyń jańa maqtanyshy bolatyn jańa nysandardy aralap júrmin. Bul burynǵy Keńes elderi arasyndaǵy osyndaı jalǵyz vokzal, men tipti Eýropada mundaıdy kórgen joqpyn. Ol bolashaqqa arnalyp salynǵan. Qazaqstannyń barlyq óńirin «Talgo» júrdek poıyzymen baılanystyrdyq, olar saǵatyna 150-200 shaqyrym jyldamdyqpen júre alady. Buryn Almatydan 24 saǵatta jetetin bolsaq, qazir 11 saǵat jetkilikti», dedi Prezıdent. Vokzal jolaýshylar aǵynyn, kezegin, qaýipsizdigin, elektrondy bılet satý prosesin ıntellektýaldy basqarý jelisimen qamtylǵan. Vokzaldyń birinshi jáne ekinshi qabattarynda 740 kólikke arnalǵan avtoturaq bar. Sonymen qatar, ol jerde qyzmettik-texnıkalyq bólmeler ornalasqan. Úshinshi qabatta shatyr astynda perron ornalasqan. Tórtinshi qabat eń negizgisi bolyp sanalady. Munda basty kireberis pen 10 bılet kassasy, anyqtama bıýrosy, saýda oryndary bar. Besinshi qabatta tamaqtaný oryndary bolsa, altynshy qabatta ákimshilik keńseler bolady. Sonymen qatar, vokzalda ana men bala bólmeleri, qonaq úı, medısınalyq pýnkt bar. Vokzaldyń qaýipsizdigine de kóp kóńil bólingen. Ǵımaratta adamdardy tekseristen ótkizetin 16 kireberis bar. Onyń ústine aqyldy júıemen basqarylatyn 510 shaqty kamera ornatylǵan. Bul vokzalǵa negizinen sońǵy aıaldamasy Astana bolatyn poıyzdar qatynaıdy. Al eski vokzalda tranzıttik poıyzdar men qala mańy qatynasyna basymdylyq berilmek. Kelesi jyly qalanyń ortalyǵyn, EKSPO, Nazarbaev ýnıversıteti men áýejaıdy qosatyn jeńil relsti kólik (LRT) jelisi tartylatyny málim. Osy oraıda, jańa vokzal janynan qalaaralyq avtobýstar aıaldaıtyn arnaıy ǵımarat salynyp jatyr. Olardyń óz kassalary bolady. Qalalyq taksıge de jeke oryn jasalmaq. «Nurly jol» temir jol vokzalynyń qurylysy kezinde 2 myń jumys orny ashylsa, nysan paıdalanýǵa berilgennen keıin 1,8 myń adam turaqty jumyspen qamtylmaq.
Baýyrjan Muqanov, «Egemen Qazaqstan»
Sýretter Prezıdenttiń baspasóz qyzmetinen alyndy