Aýdandar men qalalardan balalary jáne nemerelerimen qol ustasyp sahnaǵa shyqqan otbasylary beınettiń sońynda zeıneti bolatynyn, baq pen bereke aqyl men tózim, syılastyq, mahabbat pen súıispenshilik, meıirim júrgen jerge qonaqtaıtynyn aıtyp turǵandaı bolady.
Osy ýaqytqa deıin «Mereıli otbasy» Ulttyq baıqaýy respýblıka boıynsha tórtinshi ret ótkizildi, onyń aýdandyq, qalalyq, oblystyq jáne respýblıkalyq satylaryna Qostanaı oblysynan 400-den asa otbasy qatysty. Bıyl da «Mereıli otbasy» baıqaýlary satylaı ótip, iriktelgender oblystyq synǵa qatysty. Bul joly baıqaýdyń «Parasatty otbasy» atalymymen Denısov aýdanyndaǵy Aıat aýylynda turatyn Maqaevtar otbasy ıe boldy. Ǵalam ataı men Qarlyǵa ájeı on bir bala tárbıelep ósirgen. Barlyǵy da eńbekte, ómirden oryndaryn tapqan, balaly-shaǵaly. Otbasynyń ortaq ıigiligine aınalǵan sharýa qojalyǵyn Ǵalam ataıdyń ózi basqarady. – Kóp balaly otbasynyń qýanyshy kóp, qıyndyǵy joq, óıtkeni birlesip kótergennen, birlik bolǵannan keıin aýyrlyq eshqashan bilinbeıdi, – deıdi Ǵalam ataı. «О́negeli otbasy» atalymymen Sarykól aýdanynda turatyn Mıshenkovtar otbasy laıyq dep tanyldy. Iýrıı men Ekaterına alty bala tárbıelep otyr. Otaǵasy da, otanasy da «Amanjol-Agro» sharýashylyǵynda jumys isteıdi, altyn astyq óndiredi. Balalary shetinen jaqsy oqıdy, tártipti, úlgili. Kishkentaı Mıshenkovtar sportpen aınalysady, mýzyka mektebine barady. Gir kóterýmen aınalysatyn uly Vasılıı aýdan, oblys qana emes, el namysyn dúldúldi jarystarda qorǵap júr. О́tken jyly Eýropa chempıonatyna qatysyp, kúmis medal alyp qaıtty. – Balany eńbekke, adamgershilikke, adaldyqqa baýlımyz, ózimiz úlgi bolýǵa tyrysamyz. Úlken qyzym Anıa Iýrıı ekeýmizdiń kómekshimiz, ákesi ekeýmiz kúnimen jumystamyz, balalarǵa, úıge qaraıdy. Ini-sińilileri aıtqanymen júredi, tyńdaıdy, – deıdi «Kúmis alqaly» ana Ekaterına. «Mereıli otbasy» atalymymen baıqaýdaǵy Amangeldi aýdany, Qarasý aýylynda turatyn Muzdahanovtar otbasy laıyq dep sheshildi. Bul kóp balaly ǵana emes, aty Qostanaı-Torǵaı óńirinen asyp, respýblıkaǵa belgili ónerli otbasy sanalady. Aıtbaı men Hanzada Muzdahanovtar 4 bala tárbıelegen, nemereler ósip jatyr. Aıtbaı aǵanyń 1977 jyly 36 jasynda óndiristik jaraqattan bir qolyn kesýge týra keldi. Qıyndyqtar bolmaı qalǵan joq. О́ner daryǵan jigerli kisi 9 jyldan keıin kesilgen qolyna sym jalǵap, qasıetti dombyrasyn qaıtadan ustady. Qazir 60 kúıdiń, 40 ánniń avtory. Qazaqstanǵa eńbek sińirgen mádenıet qaıratkeri, Amangeldi aýdanynyń qurmetti azamaty. Muzdahanovtar balalaryn, nemerelerin mýzykaǵa baýlydy. Al ákeniń óner jolyn qyzy Anar jalǵady. Ol qazir Astana qalalyq akademııalyq fılarmonııasynyń beldi kúıshisi. Aıtbaı aǵa Hanzada ekeýi 55 jyl otasyp, 15 nemere, 5 shóbere súıip otyr. – Qandaı qıynshylyq kórseń de, otbasyndaǵy syılastyqty saqtaýǵa tyrysý kerek, – deıdi Hanzada apaı. – Jiger, otbasyna degen adaldyq, elge degen súıispenshilik kerek, – dep tolyqtyrdy Aıtbaı aǵaı. Ulttyq baıqaýda «Parasatty otbasy» men «О́negeli otbasy» atalymdaryna 150 myńnyń, al «Mereıli otbasy» atalymyna ıe bolǵan Muzdahanovtarǵa 300 myń teńgeniń sertıfıkaty tapsyryldy. Jeńimpaz otbasy maýsym aıynda Astanada ótetin respýblıkalyq «Mereıli otbasy» baıqaýyna qatysady.
Názıra Járimbetova, «Egemen Qazaqstan»
Qostanaı oblysy