Bul kórmeniń ereksheligi – úsh qabattan, úsh bólimnen turady. Alǵashqy qabattaǵy bóligi «Uly dala jaýharlary» dep ataldy. Munda kıiz úıdiń ishki kórinisi, at ábzelderi, qazaqtyń zergerlik áshekeıleri, turmys zattary, kıizden, teriden jasalǵan kádesyılar, ulttyq kıimder, sýretshi Jeńis Kákenulynyń birneshe kartınasy qonaqtar nazaryna usynyldy. – Táýelsiz, Qazaqstannyń óz tarıhy, mádenıeti, óneri bar. Bul kórmege sonaý saq, ǵun, túrki qaǵanaty, oǵyz zamanynan bergi qazaq dalasyndaǵy qanshama zergerlerdiń qolynan shyqqan buıymdardyń qoıylýy qazaq mádenıeti tamyrynyń tereńde jatqanyn kórsetedi. XIX ǵasyrda Kókshetaý jerinde asyl zattardyń bári jer betinde jatqan eken. Osynyń qunyn bilgen aǵylshyndar kelip terip áketken. Kezinde sal-serilerimizdiń ústi altyn-kúmiske malynýy jerimizdiń baı ekeniniń bir belgisi, – dedi ǵalym Serik Negımov. Ekinshi qabattaǵy bólimge «Kúmistiń sulý syńǵyry» degen ataý berilgen. Kúmistiń bakterııalarǵa qarsy turatyn, emdik qasıeti adamzatqa osydan alty myń jyl buryn belgili bolǵan. Sondyqtan erte kezde handar negizinen kúmis ydystan as ishýdi jón kórgen. Ataýyna saı mundaǵy zattardyń bári kúmisten ázirlengen. Kórmeniń bul bóliginde Elbasy Nursultan Nazarbaevqa túrli elderdiń delegasııalary tartý etken syılyqtar qoıylǵan. Munda kúmisten jasalǵan ydys-aıaqtardyń túr-túrin kórýge bolady. Ǵımarattyń ekinshi qabatynda sondaı-aq, jemis salǵysh vaza, sándik úshin qabyrǵaǵa ilip qoıatyn «Panno» tabaqshalary, qumǵandar, kúmisti qaraıtý ádisimen daıyndalǵan ózge de baǵaly zattar jurt nazarynan tys qalmady. Kórmeniń úshinshi qabatynda túrli elder men dáýirdiń mýzykalyq aspaptar toptamasy tanystyryldy. Osyǵan sáıkes kórmeniń bul bóligine «Álem xalyqtarynyń mýzykalyq aspaptary» degen ataý berildi. Munda Ortalyq Azııa xalyqtarynyń shekti ysqysh aspaby «gıdjak», eki shekti «dýtar», qyrǵyz xalqynyń úsh shekti «qomyzy», uıǵyrdyń «satar», koreıdiń «changý», ındonezııalyq «bonang», qytaıdyń «gong», grýzınniń tórt shekti «chongýrı», túriktiń «saz», sol sııaqty plastınkalardy oınatýǵa arnalǵan «patefon» sekildi aspaptar kórermen nazaryna usynyldy. Aıta keteıik, birer aı buryn dál osy ǵımarattyń tórtinshi qabatynda, ıaǵnı kúmbezdi zalda Ulttyq Olımpıada komıtetiniń basshylary men muraǵatynyń jeke qorlary negizinde Qazaqstannyń sporttaǵy jetistikterin kórsetetin «Olımpıadalyq qozǵalys» kórmesi ashylǵan bolatyn. «Bolashaqtyń energııasyn qarsy alamyz!» qor kórmeleriniń toptamasy 2017 jyldyń 31 tamyzyna deıin jalǵasady.
Aıan Ábdýálı, «Egemen Qazaqstan»