«Máńgilik El» jalpyulttyq ıdeıasyn iske asyrý jaǵdaıynda rýhanı-adamgershilik, estetıkalyq, patrıottyq tárbıe faktory retinde balalar men jastardyń oryndaýshylyq sheberlikterin qoldaý jáne damytý maqsatynda uıymdastyrylǵan sherýge Taraz qalasy jáne Baızaq, Jambyl, Jýaly, T.Rysqulov, Merki aýdandarynyń oqýshylary men qosymsha bilim berý, sondaı-aq orta bilim berý mekemeleriniń pedagogteri, Ońtústik áskerı okrýg qyzmetkerleri men jergilikti joǵary jáne orta arnaýly oqý oryndarynyń stýdentteri qatysty.
Merekege oraı uıymdastyrylǵan sherý Taraz qalasy Tóle bı kóshesiniń boıymen «Dostyq» alańyna ótti. Budan keıin sherýge barlyǵy 2144 adam men quramynda 100 adamnan kem emes 94 shyǵarmashylyq ujym qatysyp, sherý qoraptarynda balalar jáne jastar mýzykalyq ansamblderi, halyq aspaptary orkestrleri, úrmeli aspaptar, ishekti-ysqyly aspaptar, barabanshylar, bıshiler, sondaı-aq basqa da mýzykalyq ujymdardyń túrlerimen qatar, majoretkalar men cherlıderler óner kórsetti.
Sherýge qatysýshylardyń kıim formasy da birdeılendirilip, shaǵyn formadaǵy erekshe shyǵarmalar oryndaldy. Máselen jınalǵan kópshilik Mosarttyń, Bramstyń, Rýnovtyń klassıkalyq formadaǵy shyǵarmalaryn tyńdady. Sondaı-aq, Latıf Hamıdıdiń «Amangeldi marshy», Nurǵısa Tilendıevtiń «Álqıssa», Eskendir Hasanǵalıevtiń «Atameken» týyndylary da oryndaldy. Sonymen qatar, zamanaýı óńdeýlerdegi valster, marshtar men polkalar da halyqqa jol tartty.
Oblys ákimi Kárim Kókirekbaev ortalyq «Dostyq» alańyna jınalǵan jambyldyqtardy 1 maýsym – Balalardy qorǵaýdyń Halyqaralyq kúnimen quttyqtap, óziniń ıgi tilegin jetkizdi. О́z kezeginde sherýge qatysýshylar qorap ishindegi mýzykalyq ansambldiń oryndaǵan mýzykasyna sáıkes úılesimdi túrde bı bılep, án aıtyp, birdeı qımyldaý arqyly kópshilikke jaqsy áser qaldyrdy. Al sherý «Dostyq» alańynda barlyq bilim berý mekemeleriniń saltanatty defılesimen aıaqtaldy.
Hamıt Esaman,
«Egemen Qazaqstan»
Jambyl oblysy