– Olga, siz bir emes, úsh birdeı Olımpıadaǵa qatystyńyz. Úsheýinde de júldeger boldyńyz. Odan bólek qanshama álem chempıonattaryna bardyńyz. El namysy synǵa túsken dodalarda san márte kók Týymyzdy jelbiretip, Ánuranymyzdy áýelettińiz. Aıtyńyzshy, Tý kóterilip, Ánuran shyrqalǵanda qandaı kúıge bólenesiz?
– Kez kelgen sportshy úshin Memlekettik tý men Ánurannyń orny bólek ekeni daýsyz. Tý men Ánuran ǵana emes, jalpy memlekettik rámizderdiń qadirin ózgelerden góri sportshylar qaýymy jaqsy biledi dep oılaımyn. Al endi memlekettik týdyń kóterilgen sátin, ásirese, aspan tústes baıraqty óziń kóterip, ıyǵyńa jamylǵan kezderińdi sózben jetkizý qıyn. Mundaı kezde qara basyń úshin ǵana shattanbaısyń, saǵan úmit artqan artyńdaǵy qara ormandaı eliń úshin, baıtaq jeriń úshin maqtanyp, masattanasyń. Boıyńdy erekshe qýanysh sezimi bıleıdi. Bıikke kóterilgen saıyn, árbir jetistikke jetken saıyn elimizdiń ósip, órkendep, sport salasynyń qulashyn keńge jaıyp kele jatqanyna marqaıasyń.
Álemdik deńgeıdegi básekelerge el atynan qatysý qaı kezde de úlken jaýapkershilik júkteıdi. Eger jerimizde tynyshtyq bolmasa, halyqtyń ál-aýqaty tómen bolsa Azııa oıyndary, Olımpıada sekildi qurlyqtyq, álemdik deńgeıdegi aýqymdy sporttyq jarystarǵa qatysar ma edik, qatyspas pa edik. Sondyqtan osyndaı dúbirli dodalarda baq synap, týymyzdy asqaqtatyp, Ánuranymyzdy aspandatýǵa múmkindik bergeni úshin, tıisti jaǵdaı jasaǵany úshin memleketimizge alǵys aıtamyn.
Sportshy bolǵan soń shet memleketterde kóp júremiz. Sonda shet eldegi áriptesterim bizdiń týdyń túsine tańǵalyp, «Sizderdiń týlaryńyzdyń bezendirilýi qandaı ádemi. Kók degen ǵajap tús qoı. Qyrannyń sýreti de keremet tańdalǵan» dep ózderiniń lebizderin bildiredi. Sheteldikter bizdiń Týdy basqa eldiń týlarynan tez aıyrady. Birden tanıdy. Olar Qazaqstan týraly da aıtyp, bizdiń ústimizdegi tý tústes kıim formasyna qyzyǵýshylyq bildirip jatady. Keıbir elderdiń týy bir-birine uqsap jatady ǵoı. Bizdikin birden tanısyń. Kózińe ottaı basylady. Jáne bizdiń Týdyń mán-maǵynasy týraly aıtyp túsindirý de ońaı.
Memlekettik tý týraly ne aıtýǵa bolady? Basqalardy bilmeımin, óz basym Týǵa kóz salsam erkindikti sezingendeı bolamyn. Kún astynda qalyqtaǵan qyran. Aspan keńistigi. Qandaı ǵajap! О́ziń de baıraqtaǵy qyrandaı qalyqtap, samǵaǵyń keledi. Memlekettik eltańbamyzdyń da maǵynasy tereń. Eltańbany kórgen adam elimizdiń tarıhy men mádenıetine tereń boılaǵandaı bolady.
– 2012 jylǵy London Olımpıadasynda sizdiń kók Týdy jelbiretip, atshaptyrym stadıondy «alaqaılap» aınala júgirgenińiz esimizde. Sol bir sátti sanamyzda taǵy bir márte jańǵyrtýdyń reti kelip turǵan sekildi.
– Adam degen qyzyq qoı. Áýelde jeńistiń ne ekenin, onyń salmaǵyn sezinip úlgermeıdi ekensiń. Áıteýir qýanyshtan et-júregim eljirep, aranyń uıasyndaı gýildegen stadıondy aınala júgirgenim áli esimde. Árıne, kóz aldyńdaǵy myńdaǵan, teledıdardyń ar jaǵyndaǵy mıllıondaǵan adamnyń aldynda Týdy tóbeńnen asyra kóterip júgirgen sáttegi qýanysh, shattyq sezimin tilmen aıtyp jetkizý qıyn. Mundaı sátte ne oılaısyń? Taǵy da Ánuranymyzdy áýeletip, kók Týymyzdy jelbiretip, elińniń alapatyn asyrsam dep oılaısyń. 17 mıllıon halyqtyń atynan shyǵyp, namysty qoldan bermegenińe qýanasyń. Bul, árıne, men úshin zor qurmet, úlken maqtanysh. Mundaı sátke jetý úshin de uzaq jattyǵasyń, qanshama uıqysyz túnder men kúlkisiz kúnderdi ótkizesiń. Árıne, eldiń jankúıerleri aldynda, atshaptyrym stadıonda óner kórsetý de ońaı emes. Eldiń bári saǵan kóz tigip otyrady. Tolqısyń, qobaljısyń. Jattyǵý jasaǵan kezde «aldaǵy bolatyn jarysta men altyn alamyn, minbede turamyn, Ánuran shyrqaımyn, Týdy kóteremin» dep eshqashan oılamaısyń. Tek qana laıyqty óner kórsetýdi oılaısyń. Al endi jeńiske jetip, minbege kóterilgende maqsatyńnyń oryndalǵanyna, eńbegińniń esh ketpegenińe rııasyz qýanasyń. Árıne, minbede turyp elińniń atyn asqaqtatqanyńa, osy eldiń perzenti bolǵanyńa shattanasyń. Qanshama qıyndyqtan keıin tókken teriń aqtalyp, minbede turǵanda jeńildep, ıyǵyńnan úlken júk túskendeı keremet sezimdi bastan keshesiń.
– О́tkenge sál sheginis jasasaq. Eń alǵash Ánuranymyzdy shyrqatyp, kók Týdy jelbiretken kezińiz esińizde me?
– Árıne, esimde. 2006 jyly Qatar astanasy Doha qalasynda ótken Azııa oıyndarynda jeti saıystan birinshi oryn aldym. Bul – meniń halyqaralyq deńgeıdegi alǵashqy jarysym bolatyn. Osy básekeden keıin qanshama dodalarda baq synap, Ánurandy san márte áýelettim.
– Memlekettik rámizder kúnine oraı jankúıerlerińizge qandaı tilek aıtar edińiz?
– Barsha qazaqstandyqtarǵa eń áýeli densaýlyq pen beıbitshilik tileımin. Elimizde árdaıym turaqtylyq pen tynyshtyq, yntymaq pen bereke saltanat qursa eken deımin. Barlyq otbasynda molshylyq bolyp, el azamattary eńbeginiń jemisin jep, atqarǵan qyzmetiniń qyzyǵyn kórse eken deımin. Eń bastysy, elimizde tynyshtyq bolsyn! Barlyǵymyz elimizdiń abyroıyn asqaqtatý jolynda jumyla eńbek eteıik.
– Áńgimeńizge rahmet.
Áńgimelesken Azamat Qasym, «Egemen Qazaqstan»
О́skemen