Eń aldymen baıandama jasaǵan Qarjy mınıstri Baqyt Sultanov joǵaryda atalǵan qujat aıasynda Kelisimniń qoldanylý merzimi 2018 jyldyń 31 jeltoqsanyna deıin uzartylatynyn málimdedi. Mınıstrdiń aıtýynsha, mundaı sheshim qabyldanýyna bıylǵy jylǵy pılottyq joba nátıjelerine taldaý júrgizý qajettigi sebep bolǵan. Sondaı-aq, senatorlar kún tártibine shyǵarylǵan ekinshi másele retinde «Qazaqstan Respýblıkasy men Azııa Damý Banki arasyndaǵy Qaryz týraly kelisimdi (Jaı operasııalar) (OAО́EY 1 jáne 6-dálizderin qosatyn «Aqtóbe – Maqat» avtomobıl jolyn rekonstrýksııalaý jónindegi joba) ratıfıkasııalaý týraly» zań jobasyn qabyldady. О́tken jyldyń 7 jeltoqsanynda Astanada qol qoıylǵan kelisim aıasynda «Aqtóbe – Maqat» avtomobıl jolyn rekonstrýksııalaýdy qarjylandyrýǵa 240 300 myń AQSh dollary mólsherinde qaryz berý kózdeledi. Al Respýblıkalyq bıýdjetten qaryzdy birlesip qarjylandyrýǵa 32 765 myń AQSh dollary bólinedi dep kútilýde. Bes jyldyq jeńildikti kezeńdi qosa alǵanda, qaryz 18 jyl merzimge beriledi. Qarajatqa qyzmet kórsetýdi jáne ony óteýdi respýblıkalyq bıýdjet qarajaty esebinen elimizdiń Qarjy mınıstrligi júzege asyratyn bolady. Senattyń Qarjy jáne bıýdjet komıtetiniń múshesi Erbolat Muqaev atalǵan zańnyń mańyzdylyǵyn aıta kelip, Úkimettiń nazaryn joldardyń boıynda demalatyn oryndar, ýaqytsha kólik toqtaý alańdary, tamaqtaný, saýda-sattyq pýnktteri, tehnıkalyq qyzmet kórsetý stansalary, qalalardyń kireberisinde kólik jýý pýnktteri, avarııalyq shaqyrý baılanysy, joldar boıyndaǵy eldi mekenderdiń tusynda jol jaǵasyndaǵy bıznes múldem joqtyń qasy ekendigine aýdardy. Onyń pikirinshe, eger mundaı qadamdar júzege asyrylsa halyqaralyq tranzıttik baǵyttyń básekege qabilettiligi arta túsýine oń septigin tıgizedi. Senat depýtattary qabyldaǵan kelesi qujat «Qazaqstan Respýblıkasynyń keıbir zańnamalyq aktilerine ósimdikter men janýarlar dúnıesi máseleleri boıynsha ózgerister men tolyqtyrýlar engizý týraly» zań jobasy boldy. Ekinshi oqylymda qaralǵan qujat bıologııalyq áralýandyqty saqtaý úshin ekonomıkalyq, áleýmettik, uıymdastyrýshylyq jáne ózge de jaǵdaılardy jasaýǵa baǵyttalǵan. Atap aıtqanda, orman jáne ań aýlaý sharýashylyǵy, erekshe qorǵalatyn tabıǵı aýmaqtar salasyndaǵy qoldanystaǵy zańnamaǵa, sondaı-aq, ekologııalyq jáne ózge de aralas zańnamaǵa túzetýler engizý kózdelip otyr. Sonymen qatar, bul zańdaǵy keıbir jekelegen baptar ormandy paıdalaný, balyq sharýashylyǵy qyzmeti, janýarlar dúnıesi obektilerin jasandy ósirýdi, janýarlardy elimizge ákelý jáne áketý máselelerin de qarastyrady. Sondaı-aq, memlekettik ulttyq parkter men olardyń qorǵalatyn aımaqtarynyń aýmaqtaryn paıdalaný tártibi naqtylanyp, bıosferalyq rezervattardyń quqyqtyq tártibi belgilenedi. Atalǵan zań jobasy boıynsha baıandama jasaǵan Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń múshesi Rashıt Ákimovtiń aıtýynsha, qujat 2019 jylǵy 1 qańtardan bastap orman sharýashylyǵy men erekshe qorǵalatyn tabıǵı aýmaqtar qyzmetkerleriniń laýazymdyq eńbekaqylaryn 25 paıyzǵa joǵarylatýdy, sondaı-aq, olarǵa mal jaıý men shóp shabý úshin jer ýchaskelerin berýdi kózdeıdi.
Nurlybek Dosybaı, «Egemen Qazaqstan»