Bul óte jaýapty jumys ekeni aıtpasa da túsinikti. Bıýdjettiń oryndalýyna (kiris, shyǵys bólikteri), memlekettik satyp alý prosesteriniń barlyq rásimderiniń zań sheńberinde atqarylýyna baqylaý júrgize alatyn, sonymen birge, atalǵan ákimdikterge berilgeli otyrǵan kommýnaldyq menshikti basqara alatyn mamandar men basshylar aýyldyq jerlerde tapshy ekeni belgili. Al zańda kórsetilgen rotasııalaý jumysy tolyqqandy oryndalmaýda. Sebebi, aýdandarda, aýyldarda qyzmettik turǵyn úımen qamtamasyz etý máselesi uzaq jyldan beri sheshimin tappaı keledi. Mundaı úıler tek aýyl ákimdikterinde ǵana emes, sonymen qatar, oblystyq mańyzy bar qala, aýdandardyń jáne oblystardyń ortalyqtarynda da bolýy tıis. Sonda ǵana oblys ortalyqtarynan, aýdan ortalyqtary men qalalardan qatynap aýyl basqaratyn «atústi» jumys emes, sol elderdiń tynys-tirshiligin, ystyq-sýyǵyn birge kórip júrgen mamannyń, basshynyń tyńǵylyqty jumysyn kórer edik jáne ártúrli kúdikti suraqtardyń týyndaýy men zań buzýshylyqtarǵa jol berilmes edi. Turǵyn úı qurylysy jergilikti bıýdjet esebinen sheshilýi tıis ekeni belgili. Alaıda, barlyq óńirler óz bıýdjetterimen bul jumystardy júrgize almaıtyny da anyq. Elimizdiń atqarýshy bılik organy joǵaryda baıandalǵannyń negizinde shaǵyn eldi mekenderdi kásibı bilikti mamandarmen qamtamasyz etý úshin jekeshelendirýge jatpaıtyn qyzmettik úı qoryn qalyptastyrý máselesin qarastyrsa, aýyldardaǵy maman kadrlar máselesi birte-birte oń sheshimin tapqan bolar edi.
Baıdildá JYLQYShIEV, Májilis depýtaty