2016 jyldyń 22 sáýirinde qol qoıylǵan jahandyq kelisimniń qurylýyna bir kezderi Barak Obama ákimshiligi belsene aralasqan bolatyn. Al qazirgi Aq úı basshylyǵy bul kelisimniń eshqandaı da paıdasy joq ekenin aıtyp, ortaq qujattan bas tartyp otyr.
О́tken apta sońynda Italııada bas qosqan G7 memleketteriniń kezdesýinde álemdegi eń qýatty memleketter basshylary birqatar ortaq kelisimge kelgenimen, AQSh prezıdenti Donald Tramp Úlken jetiliktiń saýda saıasatynan bólek osy «Parıj kelisiminen» bas tartatynyn málimdegen edi.
Bul áreketi týraly álem elderiniń kóshbasshylaryna túsinik bergen Tramp AQSh kelisimnen bas tartqanymen, qorshaǵan ortany qorǵaý saıasatynan bas tartpaıtynyn, kerisinshe, Qurama Shtattar álemdegi eń taza memleketterdiń biri bolýdy josparlap otyrǵanyn jetkizdi. Aq úı basshysynyń málimdeýinshe, qorshaǵan ortany qorǵaý salasynda ár memleket óz betinshe jumys istegeni jón.
Aıta keteıik, AQSh-taǵy iri kompanııalar men kásiporyndar qazirgi tańda qorshaǵan ortany qorǵaý saıasatyna basymdyq berýde. Bul óz kezeginde klımattyń jylynýyna qarsy el úkimetteriniń emes, ondaǵy árbir azamat pen kásiporyndardyń birlese jumys isteýi kerek degen qazirgi amerıkalyq saıasattyń baǵdaryn kórsetse kerek. Máselen, Space X kompanııasynyń basshysy Ilon Mask pen sol sekildi eldiń iri kásipkerleri jyl saıyn osy baǵytta aýqymdy qarajat jumsap keledi.
Qazaqstanǵa keler bolsaq, ótken jyldyń sońynda el Parlamenti «Parıj kelisimin ratıfıkasııalaý týraly» QR Zańyn maquldap, oǵan Elbasy qol qoıǵan edi. El úkimeti bul turǵyda jahandyq jylyný men qorshaǵan ortaǵa kómirqyshqyl gazynyń taraýyn shekteý maqsatynda birqatar mindettemeler alǵan. Kelisimge saı, endi kómirqyshqyl gazyn qorshaǵan ortaǵa belgilengen shekten asyryp jibergen kásiporyndar, mekemeler jaýapkershilikke tartylmaq.
Jalpy, qazirgi tańda bul kelisimdi álem boıynsha 146 el ratıfıkasııalap, 48 el qol qoıǵan. Tek Sırııa men Nıkaragýa ǵana qosylmaǵan. Kesheden beri endi olardyń qataryna AQSh qosylyp otyr.