Saltanatty rásimge qatysqan oblys ákiminiń birinshi orynbasary Ǵumar Dúısembaev: «Jas otaý» baǵdarlamasy boıynsha 2015 jyly 90 páterlik úı paıdalanýǵa berilgen edi. Endi ekinshi úıdiń qonystanýshylary qýanyshqa kenelip otyr. Bul - Elbasynyń halyqqa, sonyń ishinde jastarǵa degen qamqorlyǵynyń kórinisi, eldiń áleýmettik jaǵdaıyn, turmysyn jaqsartýǵa baǵyttalǵan saıasatynyń jemisi» - dedi.
Oblystyq jastar saıasaty máseleleri basqarmasynyń basshysy Jasulan Bısembıevtiń aıtýynsha, «Jas otaý» baǵdarlamasy boıynsha 29-ǵa tolmaǵan, otbasynda múgedek jan bar, sportta, ónerde, basqa da salalarda jetistikterge jetip júrgen jastar, sondaı-aq, bıýdjettik mekeme men memlekettik organdar qyzmetkerleri, áskerı qyzmetshiler baspanaly bola alady. Turǵyn úı zaemdaryn resimdegende jalaqylarynyń mólsherleri jetpeı qalǵan jas otbasylarǵa ata-analary kepildik bergen.
«Jas otaý» úıleriniń qurylysyn «Aq qaınar» JShS júrgizgen. Alǵashqy qonystaryna qol jetkizgender qatarynda Qarabalınder otbasy da bar. Shańyraq ıesi Aıdos –jýrnalıst, al jubaıy muǵalim. Qoǵam ómirine belsendi aralasyp júrgen jastar baspanaly bolǵandaryna aıryqsha qýanyshty.
Qazir óńirlik baǵdarlama sheńberinde 100 páterlik turǵyn úı salynyp jatyr. Ol jyl aıaǵyna deıin paıdalanýǵa beriledi. Sonymen qatar, «Qoljetimdi baspana - 2020» baǵdarlamasy aıasynda jas otbasylarǵa 30 páterdi tapsyrý josparda bar.
Baqytgúl Babash,
«Egemen Qazaqstan».
Atyraý.