Sondaı-aq, saltanatty jıynǵa oblys ákimi Erlan Qoshanov arnaıy qatysyp, barsha jınalǵan qaýymdy mereıli merekemen quttyqtady.
- Memlekettik rámizder – kez kelgen eldiń armany men muratyn aıqyndaıtyn erekshe belgi. Al, biz úshin rámizder jaı ǵana nyshan emes, onda ata-babalarymyzdyń azattyqqa degen umtylysy, halqymyzdyń táýelsiz el bolamyn degen talpynysy bar. El rámizderi eń aldymen bizdiń memleketimizdiń ótkeni, búgini men bolashaǵy.
Elbasy aıtqandaı, olar Táýelsizdiktiń qasıetin biriktirýshi obrazdar. Qazaq halqynda, «halyqtyń rýhyn kórgiń kelse jergilikti týyna qara, eliniń eldigin kórgiń kelse eltańbasyna zer sal, arman-maqsatyn kórgiń kelse uranyn tyńda» degen naqyl bar. Memlekettiń basty nyshandaryn júregine basqan eldiń eńsesi tik, rýhy joǵary bolady. Endeshe memlekettik rámizderdi qurmettep, qasterleı bilý bizdiń paryzymyz, – dedi oblys ákimi.
Azattyqtyń aq týyn jelbiretip, araılap atqan búgingi tańǵa da jettik. Munyń barlyǵy sonaý zobalań jyldardaǵy elim dep eńiregen, jerim dep jaǵasy jaý qolynda ketken batyr babalarymyzdyń Otanyna atylǵan oqqa qurysh keýdesin tosqandyǵynyń arqasynda qoljetken jetistikterimiz. Qazir mine, qyranymyz kókte qalyqtap, kók baıraǵymyz kórgen kózge kózaıym bolyp turǵany málim.
Eski tarıhtyń eleýli tustary óte kóp. Shırek ǵasyr buryn Altaı men Atyraý arasyndaǵy Uly dalada óshken otty qaıta jaǵyp, Táýelsizdigin tuǵyryna qondyrǵan Qazaqstan 1992 jyldyń 4 maýsymy kúni memlekettik rámizderin bekitken edi.
Endi mine sol rámizderimizdiń bekitilgenine de shırek ǵasyr tolyp otyr. Eldigimiz eńseli, Táýelsizdigimiz tuǵyrly bolǵaı!
Mıras Asan,
«Egemen Qazaqstan»
Qaraǵandy oblysy