Sharaǵa Parlament Májilisi Tóraǵasynyń orynbasary, «Nur Otan» partııasy fraksııasynyń basshysy Gúlmıra Isımbaeva, Májilis Tóraǵasynyń orynbasary Vladımır Bojko, densaýlyq saqtaý máselesi boıynsha partııalyq tálimger Záýresh Amanjolova, Densaýlyq saqtaý mınıstri Eljan Birtanov, Májilistegi partııa fraksııasynyń jáne QHA depýtattyq tobynyń músheleri, vıse-mınıstrler, ortalyq jáne jergilikti atqarýshy memlekettik organdardyń ókilderi, respýblıkalyq jáne óńirlik medısınalyq ortalyqtar men úkimettik emes uıymdardyń basshylary, sondaı-aq, sarapshylar qaýymdastyǵy men beınebaılanys rejiminde aımaq ókilderi de qatysty.
Qazirgi qoǵamdaǵy densaýlyq saqtaýdyń mańyzy jóninde pikir aıtyp, jıyndy ashqan M.Qul-Muhammed halyqtyń densaýlyǵyn jaqsartyp, ómir sapasyn arttyrý Elbasy saıasatynyń eń mańyzdy baǵyttarynyń biri ekendigine erekshe toqtaldy.
«Táýelsizdik jyldary Qazaqstan ómirlik mańyzy bar atalǵan salanyń damýynda aıtarlyqtaı jetistikterge qol jetkizdi. Elimizdiń basty saıası kúshi retinde «Nur Otan» partııasy bul mańyzdy memlekettik baǵdarlamanyń júzege asyrylý barysyn odan ári qatań baqylaıtyn bolady. Halyqtyń densaýlyǵy – memlekettiń gúldenip-kórkeıýiniń negizi», – dedi.
О́z kezeginde negizgi baıandama jasaǵan Densaýlyq saqtaý mınıstri E.Birtanov «Densaýlyq» memlekettik baǵdarlamasyn júzege asyrýdyń 2016 jylǵy qorytyndysy boıynsha birqatar baǵyttar jóninde naqty derekter keltirdi.
«Atap aıtqanda, qoǵamdyq densaýlyq saqtaý qyzmetiniń negizi qalyptasýymen qatar, elimizdiń jeti aımaǵyndaǵy qalalyq emhanalarǵa aýrýlardy basqarý baǵdarlamasyn engizýge arnalǵan jańa joba júzege asyrylýda. Sondaı-aq, Úkimettik emes uıymdar, jeke sektorlar jáne farmındýstrııa ókilderinen turatyn sapa jónindegi birlesken komıssııa qurylyp, Qazaqstandyq ulttyq dárilik formýlıar engizý boıynsha jumystar da jalǵasyn tabýda. Besinshi baǵyt boıynsha mindetti medısınalyq saqtandyrý júıesi engizilip, adam resýrstaryn strategııalyq basqarý jáne medısınalyq bilimdi jańǵyrtý boıynsha naqty jobalar da qolǵa alynýda. Jáne sońǵysy atalǵan salada memlekettik-jekemenshik áriptestikke basymdyq berilýde. Osyǵan oraı, mınıstrlik janynan Bıznes-keńes óz jumysyn bastap, memlekettik-jekemenshik áriptestikti jáne ınfraqurylymdy damytýdyń jol kartasy daıyndalý ústinde», – dedi mınıstr.
Alqaly keńeske qatysýshylar salaǵa qatysty jaýapty mamandarǵa ózderin tolǵandyrǵan san túrli saýaldaryn joldap, jaýabyn aldy. Ásirese, halyq qalaýlylary medısınalyq mekemelerdegi mamandardyń tapshylyǵy men qyzmetkerlerdiń biliktiligin arttyrý, medqyzmet sapasyna baqylaýdy kúsheıtý, medısınalyq mekemelerdi ınternetpen tıisti deńgeıde jabdyqtaý, sanıtarlyq avtokólikpen qamtý, emdelýge kvota alý, bólshektep satylatyn dárilik preparattardyń baǵasyn retteý, sondaı-aq, naýqastardyń tekserilýge jáne emdelýge ketken shyǵyndaryn óteý syndy ótkir máselelerdi ortaǵa saldy. Sol sebepten de bastapqy medısınalyq-sanıtarlyq kómek júıesindegi medısınalyq qyzmetti ortalyqsyzdandyrý, salamatty ómir salty jónindegi baǵdarlamaǵa aıryqsha kóńil bólý jáne adam aǵzasyna qaýipti qaldyqtarmen aýany lastaıtyn óndiris oryndarynyń jaýapkershiligin kúsheıtýge qatysty naqty usynystar joldanǵan jıynda mindetti áleýmettik medısınalyq saqtandyrýdy engizý jónindegi mańyzdy reformanyń mán-mańyzy da jan-jaqty talqylandy. Bul taqyryp boıynsha Qor jetekshisi Elena Bahmýtova arnaıy baıandama jasady. Sóıtip, densaýlyq saqtaý salasynyń ózekti tustaryna nazar aýdarylyp, tıisti sharalardy qolǵa alý qajettigi pysyqtalǵan keńesti qorytyndylaǵan Muhtar Qul-Muhammed mundaı basqosýlar ózekti máselelerdi der kezinde anyqtap, ony sheshý joldaryn ýaqytynda usynýǵa múmkindik beretinin aıtty. «Nur Otan» partııasy Tóraǵasy Birinshi orynbasarynyń aıtýynsha, partııalyq tyńdaý kezinde jasalǵan usynystardyń barlyǵy jaqyn kúnderi tıisti organdarǵa joldanbaq.
Aıta keteıik, elimizde sońǵy 5 jyl ishinde 381 densaýlyq saqtaý nysandary salynǵan bolsa, onyń 19-y – aýrýhana, 41-i – emhana jáne 314-i – dárigerlik ambýlatorııa. Memleket medısınalyq mekemelerdi zamanaýı qymbat jabdyqtarmen qamtamasyz etý jaıyn da nazardan tys qaldyrmaýda. Nátıjesinde, medısınalyq kómek kórsetý joǵary tehnologııalyq deńgeıge jetti. Ásirese, kardıohırýrgııa, transplantologııa, neırohırýrgııa, travmotologııa, ortopedııa jáne taǵy basqa salalar boıynsha kórsetkishter joǵary. Sol sııaqty maman daıarlaý isi de ilgerilep keledi. Búginde elimizde jáne shetelderde oqytý jumystary qarqyndy júrgizilýde. Damyǵan eldermen tájirıbe almasý isi de júıeli jolǵa qoıyldy. Sondaı-aq kóliktegi medısına, qashyqtyqtan keńes berý medısınasy jáne telemedısına salasy qarqyndy damyp, elimizde atalǵan salanyń jetilip, zamanaýı tehnologııamen jabdyqtalýyna baılanysty mınıstrlik kvotasy boıynsha shetelde emdelýge muqtaj naýqastardyń sany azaıýda.
Nurlybek Dosybaı,
«Egemen Qazaqstan»