Aldyn ala kelisilgen merzimde bizdi seriktestik basshysynyń ózi qarsy aldy. Ysylsyn degen oımen ádeıi jastardyń ózine suraq qoıdyrdym. Sol sátte stýdentim Berdibek Safarov: «Aǵaı, siz osy mamandyqqa qalaı keldińiz?» dep surap úlgerdi. Ol kúlimsireı qarap: «Meniń negizgi mamandyǵym qurylys ınjeneri ǵoı, Jambyl gıdromelıoratıvtik qurylys ınstıtýtyn «qurylys ınjeneri» mamandyǵy boıynsha bitirgenmin. Eńbek jolymdy 80-jyldardyń sońynda «Qyzylorda úı qurylysy» kombınatynda sheber bolyp bastaǵanmyn. 80-jyldardyń sońyndaǵy ekonomıkalyq toqyraý maǵan da, meniń otbasyma da óz salqynyn tıgizdi. Kombınat jalaqy ornyna qurylys materıaldaryn beretin, aılap jalaqy almaǵan kezimiz boldy. Aldaǵy kúnnen úmitti jas jigitpiz ǵoı, úılenip otbasyn qursam qajet bolar dep jınaǵan qurylys materıaldaryn azyq-túlikke, kúrishke aıyrbastadyq. Aıyrbas saýda, barter degenniń dámin alǵash ret sol jyldary tattyq. Sol jyldary Syr óńirinde óndiriletin mehnaty kóp kúrish daqylynyń barynsha tómen baǵalanatynyn bilip ishteı qynjylatyn edik. Osylaısha bıznes degen belgisiz álemniń esiginen eptep engenbiz», dedi Abzal Jumashuly. Osy sátte jáne bir stýdent: «Kompanııa qalaı quryldy? Qansha adam boldy?» dep jedeldete suraǵyn qoıa bastady. «Jańa aıtyp ótkenimdeı sol kezde kompanııanyń basshysy da, júkshisi de ózim boldym. Ýaqyt tyǵyz, 25-50 kılo kúrish salynǵan qaptardy tasý da, jetkizý de ońaı emes edi, árıne. Biraq, men qalaı da tabys tabamyn, ata-anamdy, baýyrlarymdy alǵa shyǵaramyn dep tyrystym. Ata-anam desem, aýylym eske túsetin. Aýyldyń kórkeıgen kelbetin, ata-anamnyń dáýletti turmysyn kórgim keletin. «Jalǵyz aǵash orman emes» degendeı, janyma baýyrlarym Murat, Marat Sársenbaevtar keldi. Sóıtip, kompanııanyń irgetasy 1994 jyly qalandy», deıdi kompanııa basshysy. Kúrish zaýyty degenge júzdegen, myńdaǵan adam eńbek etetin zaýyt pa desek, bári jınaqtalǵan, júıelengen óndiris oshaǵy eken.Tap-tuınaqtaı taza aýla, jerden tóbege deıin uqypty jınalǵan kúrish salynǵan qaptarǵa siresken qoımalar, kúrishi bólek, kúrmegi bólek, tek pýltpen basqarylyp turatyn nemis, koreı, qytaı tehnologııasymen jabdyqtalǵan zaýytyńyz osy. Al kelesi keremetke kóz toımaı qaradyq. Naýryzdyń qatqaq qary sógile bastaǵan mezgilde jaınap turǵan baqqa kez boldyq. Bul – kompanııanyń gúl ósiretin jylyjaılary edi. Ishte 25-30 gradýs temperatýra kórsetip turdy. Osy jylyjaıda ósirilgen gúlder Naǵı Ilııasov aýylynyń kóshelerin kómkerip, kórkemdep turady. Kompanııa ónim óndirýden tájirıbe jınaqtaı otyryp, álemniń kúrish ósirýshi elderiniń tehnologııasyn óz óndirisine qosty. Qazirde de batystyń ıakı nemis tehnologııasynyń iske qosylýy nátıjesinde saǵatyna 5 tonnadan astam kúrish aqtap, jylyna 30-35 myń tonna kúrishti óńdep, suryptap saýdaǵa shyǵarýda. «Abzal ı K» seriktestiginiń ónimderi álemdik standarttyń suranysyna jaýap beredi. Abzal azamattyń týǵan aýylyn kórkeıtý úshin jasaǵan eńbegi halyqtyń shynaıy rızashylyǵyn týǵyzdy. Shylqyǵan baılyq pen sán-saltanatty ómir súrip jatsa da, qarip-qaser men jetim-jesirge qaraılaspaıtyn qaıyrsyzdar tolyp jatyr emes pe? Al bizdiń keıipkerimiz naǵyz «Atymtaı jomarttyń» ózi. Bir ózi eki aýyldy birden kórkeıtip gúldendirýge ýaqytyn da, qarjysyn da aıaǵan joq. Abzal Eralıev óz áriptesteri men aýyldastarynyń eńbegine saı aqy tólep, 3 otbasyna óz qarajatynan baspana turǵyzyp berdi. Halqynyń rızashylyǵyn týdyrǵan taǵy bir qareketi − 2015 jyly qalanyń «Aqmeshit» shaǵyn aýdanynan kúmbezi kókke jarqyraǵan ımandylyq úıi − meshittiń salynyp paıdalanýǵa berilýine muryndyq bolǵan da osy Abzal azamat. Áleýmettiń áleýetin kóterýge meılinshe mol úles qosqany jáne aýyldy abattandyrýdaǵy erekshe eńbegi úshin Abzal Eralıevke «Qazaqstannyń Eńbek eri» ataǵy berildi. Eńbektiń óteýi qaıtqan degen osy. Qazaqstan baıtaq el, beıbit Otannyń árbir taýy men tasy, syldyrap aqqan bulaǵy, saǵymdaı sozylǵan sar dalasy erlerdiń eńbegimen jaınap, jasaryp keledi. Kúrishti atyzdarda kúni-túni zamanaýı tehnıkamen jumys jasaıtyn kezeń týdy. Áıtse de, ata kásip júzi kúnge shaǵylysqan ketpendi arqalaǵan aǵam Eshmurat kúrishtiń narqyn kóterip, básekege bel sheshe kirisken Eńbek Eri Eralıevke senedi. Egemen eldiń eńbek torysy Eralıev el úmitin aqtady.
Kenjegúl QADIROVA, S.Áljikov atyndaǵy №144 orta mekteptiń oqý isi jónindegi orynbasary, joǵary sanatty tarıh pániniń muǵalimi