Solardyń ishinde atalǵan salada óz qyzmetine adal berilgen qyzmetker, qaraǵandylyq Dáýren Altaev ta bar. Dáýren Qasymjanuly Qaraǵandy qalasy ishki ister bólimi Jańa Maıqudyq polısııa bóliminiń jergilikti polısııa qyzmeti bólimshesiniń ýchaskelik polısııa ınspektory, polısııa maıory. О́z qyzmetine adal berilgen Dáýren Qasymjanulynyń ishki ister organdarynda qyzmet atqaryp júrgenine qazirgi tańda 20 jyl tolyp otyr. Dáýren Qasymjanuly 1976 jyldyń kókteminde Qaraǵandy oblysy, burynǵy Taldy aýdany, qazirgi ýaqytta Shyǵys Qazaqstan oblysy, Abyraly aýdany, Alǵabas aýylynda dúnıege kelgen. 1982 jyldyń kúzinde alǵashqy mektep tabaldyryǵyn attap, sol mektep qabyrǵasynda 11 jyldyq bilimin alyp shyǵady. Mektep bitirgen soń, Otan aldyndaǵy boryshyn atqarý úshin áskerge attanady. Áskerden keıin, 1996 jyly ishki ister organynda eń alǵash ret eńbek jolyn bastaıdy. Jol-patrýldik qyzmetinde eńbek etip, óz áriptesterine syıly, bedeldi qyzmetker atanady. Sol jyldarda jınaǵan bilim men biliktiligi nátıjesinde kezekshi bólimniń jedel kezekshisiniń kómekshisi bolyp laýazymy aýysady. Eńbek pen oqýdy qatar alyp júrgen ol B.Beısenov atyndaǵy Qaraǵandy joǵary mektebine syrttaı túsip, zańger mamandyǵyn alyp shyǵady. Oqýyn 2005 jyly aıaqtap, ofıser atanady. Sodan bastap, ıaǵnı 2006 jyldan beri ýchaskelik polısııa ınspektory qyzmetin adal atqarýda. Otbasynda zaıyby ekeýi tórt bala tárbıelep otyrǵan úlgi tutar áke. Dáýren Qasymjanuly óziniń ishki ister organyndaǵy qajyrly eńbeginiń arqasynda oblystyq IID jáne qalalyq IIB basshylyǵy tarapynan birneshe márte, sondaı-aq, minsiz qyzmeti úshin II jáne III dárejeli medaldarmen marapattalǵanyn aıta ketken jón. Ishki ister mınıstrligi tarapynan 2006 jyly «Úzdik qyzmeti úshin» tósbelgisimen marapattalǵan. D.Altaevtyń sońǵy ýaqyttaǵy eren eńbeginiń birden-bir dáleli retinde qyzmet atqarý barysynda bir otbasynyń tórt birdeı balasyn órtten qutqaryp alyp shyqqan erligin aıtýǵa bolady. Oqıǵa barysyn qysqasha tarqatatyn bolsaq, sol kúni ádettegideı jumys ýaqytynda Dáýren Qasymjanulyn Maıqudyq eldi mekeninde óz aýmaǵyndaǵy úılerdiń birine jetýi týraly habarlama túsedi. Ádettegideı otbasy janjaly bolar dep, habarlama túsken meken-jaıǵa jetkende bes qabatty úıdiń besinshi qabatynyń órtenip jatqanyn kóredi. Es-tústerinen aıyryla shýlaǵan kórshiler úıdiń ishinde balalardyń baryn aıtady. Sol sátte órttiń qara tútinine qaramastan, Dáýren Qasymjanuly bilek sybana balalardy qutqarýǵa tyrysady. «Páterge kirsem, tútinnen basqa eshteme kórinbeıdi eken. Dereý bir matany sýǵa malyp, betime orap, bólmelerdiń ishinen balalardy izdedim. Qarasam, tórt bala kereýettiń ústinde biriniń ústine biri úımelep jatyp qalǵan. Es-tússiz. Sol sátte, demim de taýsylýǵa shaq qaldy... Sońǵy kúshimdi sarqyp, balalardy ıyǵyma arqalap syrtqa alyp shyqtym. Alǵashynda ekeýin, keıin eki balany shyǵardym. Ekinshi ret kireıin degenimde, órt odan ári órship, mańaılatpaıdy. Sonda da esh kidirmesten, janymdy shúberektiń ushyna túıip, balalardy qutqardym», – deıdi D.Altaev synaqty sátti eske alyp. Mine, qyzmetine degen osyndaı adaldyǵynyń arqasynda, tórt sábıdiń ómirin ajaldan arashalap alyp qaldy. Qyrshynynan qıylar edi, qaıyra ómir syılady. Halqymyz «Er – eńbegimen eńseli» dep beker aıtpasa kerek. Endeshe, osyndaı eńsesi bıik azamattarymyz aman bolyp, eline eńbegi sińsin dep tilek bildiremiz. Ortamyzda, Dáýren Altaevtaı qaısar jandar kóp bolǵaı.
Mıras ASAN, «Egemen Qazaqstan»
Qaraǵandy oblysy