Qala ákimi Baýyrjan Baıbek korreksııalyq mektepterdiń oqýshylary salǵan sýret kórmesinde boldy. Respýblıka saraıynda N.Ostrovskıı atyndaǵy soqyr jáne álsiz kóretin balalar tárbıelenetin №4 jalpy bilim berý mektep-ınternatynyń jáne tili jetilmegen balalar dáris alatyn №9 korreksııalyq mektep-ınternattyń, «Januıa» arnaıy kesheniniń, kereń balalar oqıtyn №5 mektep-ınternattyń, №1 jalpy bilim beretin mektep-ınternattyń oqýshylary salǵan sýret kórmesi uıymdastyryldy. B.Baıbek usynylǵan jumystardyń sapasy men sheberligin joǵary baǵalap, ásirese aqyl-oı damýy kesheýildegen balalar oqıtyn №7 mektep-ınternat oqýshylary salǵan «EKSPO-2017 – balalar kózimen» trıptıhine aıryqsha toqtaldy. Tárbıeshiler trıptıhti balalardyń 3 aıǵa jýyq salǵanyn, onyń óte qıyn jumys ekenin, jipterdi orap, kıizdi jelimdeýdiń, qazaqtyń ertedegi ádisi boıynsha keste tigýdiń óte kúrdeli ekenin aıtty. «Búgingi kórmege óz qoldarymen jasaǵan jumystaryn qoıǵan balalardyń barlyǵyna sheksiz rızashylyǵymdy bildiremin. О́ıtkeni, buıymdardyń bári derlik sapaly jasalypty. Bul jumystardyń bárinen ómirge degen súıispenshilik, kúsh-jiger, rýh seziledi. Osy bıiktikti tómendetpeńder, men senderge senemin», – dedi shahar basshysy. Almatylyq balalar úshin kóńildi sharalarmen bastalǵan merekede 5 myń bala qatysqan jastar mýzykalyq orkestrleri men ansamblderiniń sherýi ótti. Al Ortalyq mádenı jáne demalys saıabaǵynda balalardyń shyǵarmashylyq ujymdarynyń konsertteri qoıyldy. Bul mádenı sharaǵa «Senim»,«Nargız», «Móldir», «Neposedy», «Tamasha», «Sıýrprız», «Erke naz» balalar toptary, T.Júrgenov atyndaǵy О́ner akademııasynyń stýdentteri qatysty, sonymen qatar, «Boztorǵaı-2017» halyqaralyq konkýrs jeńimpazdarynyń gala-konserti ótti. Balalar úshin qýyrshaqtar, anımatorlar, sırk artısteri óz ónerlerin ortaǵa saldy, ertegi keıipkerleri, jandy daýystaǵy mýzyka kishkentaı almatylyqtardyń kóńilderin kóterdi. Saıabaqta «Meniń súıikti qalam», «Baqytty balalyq shaq», «Ekspo-2017», «Qazaqstan Respýblıkasy» atty sýret kórmeleri uıymdastyryldy.
Mıra BAIBEK, «Egemen Qazaqstan»
ALMATY