Eńbek jáne halyqty áleýmettik qorǵaý mınıstri Tamara Dúısenovanyń málimdeýinshe, 100 naqty qadam – Ult josparynyń 84-qadamyn iske asyrý aıasynda 2015 jyldyń 28 qazanynda, №369 QR «Qazaqstan Respýblıkasynyń keıbir zań aktilerine halyqty áleýmettik qorǵaý máseleleri boıynsha ózgerister engizý týraly» Zańy qabyldandy. Atalǵan Zańda 2018 jyldyń 1 qańtarynan bastap, jumysqa jaramdy otbasy músheleriniń mindetti túrde jumyspen qamtý sharalaryna belsendi qatysý talabymen, árbir múshesine sanaǵanda tabysy eń tómengi kúnkóris deńgeıiniń (búginde – 40%) 50 paıyzdan tómen otbasyǵa, ataýly áleýmettik kómekti (ári qaraı - AÁK) kórsetýdiń jańa tártibin engizý qarastyrylǵan.
Birtutas járdemaqy qazirgi is júzindegi qaǵıdalardyń ornyna usynylmaq (bul óz kezeginde járdemaqy alýǵa qajet qujattar sanyn aıtarlyqtaı qysqartady):
- kópbalaly otbasylarǵa arnaıy memlekettik járdemaqy (ári qaraı - AMJ);
- az qamtylǵan otbasylarǵa arnalǵan 18 jasqa deıingi memlekettik balalar járdemaqysy;
- az qamtylǵan úı sharýashylyǵyna beriletin ataýly áleýmettik kómek.
AÁK jańa úlgide shartsyz jáne shartty aqshalaı kómek bolyp 2 túrge bólinedi:
I. Shartsyz jáne shartty aqshalaı kómek.
a) Shartsyz aqshalaı kómek quramynda eńbekke jaramsyz músheleri bar otbasylarǵa (máselen qart zeınetkerler men múgedekter otbasy) nemese eńbekke jaramdy músheleri eńbekpen qamtý sharalaryna belgili bir sebeptermen qatysa almaıtyn otbasylarǵa (mysaly mektep jasyndaǵy balalary bar jalǵyzbasty ana) beriledi. Mundaı otbasylardan járdemaqy alýy úshin jumyspen qamtý sharalaryna mindetti túrde qatysý talap etilmeıdi.
á) Shartty aqshalaı kómek quramynda eńbekke jaramdy kem degende bir múshesi bar otbasyǵa áleýmettik kelisimshart jasaǵan jaǵdaıda, sonymen qatar, otbasynyń barlyq eńbekke jaramdy músheleri jumyspen qamtý sharalaryna mindetti túrde qatysqan jaǵdaıda beriledi.
Áleýmettik kelisimshartqa qol qoıa otyryp, taraptar ózara jaýapkershilikti moıyndaryna alady: áleýmettik qyzmetter jumyspen qamtý sharalaryn qarastyryp, járdemaqy tólese, otbasynyń eńbekke jaramdy músheleri jumyspen qamtý sharalaryna jaýapkershilikpen qatysady.
Dınara BITIKOVA, «Egemen Qazaqstan»