EXPO-2017 kórmesindegi Túrkııa komıssary, eldiń ekonomıka mınıstriniń orynbasary Fatıh Metın men Túrkııanyń ekonomıka vıse-mınıstri Taryk Sonmez jurtty túrik pavılonynyń tujyrymdamasymen tanystyrdy.
Túrkııanyń «Bolashaq energııasy» taqyrybyna arnalǵan EXPO-2017 kórmesine qatysýy týraly sheshim 2016 jylǵy tamyzdyń 5-inde Túrkııa Respýblıkasynyń ekonomıka mınıstrligi men Astana EXPO-2017 Ákimshiligi arasynda qol qoıylǵan hattamamen resmı túrde bekitildi.
Pavılonnyń jalpy aýmaǵy 1000 sharshy metrdi quraıdy. Onyń janynda Taıland, Iordanııa jáne Ázerbaıjan pavılondary ornalasqan.
Túrkııa EXPO kórmelerine 34 ret qatysty. Ol 1851 jyly Londonda ótken alǵashqy EXPO-ǵa da qatysqan el. 2016 jyly Túrkııa tuńǵysh ret óz elinde dúnıejúzilik deńgeıdegi asa aýqymdy shara «World Botanic EXPO-2016» Halyqaralyq mamandandyrylǵan kórmesin ótkizý quqyǵyna ıe boldy. «Balalar men gúlder» devızimen ótken bul kórme osy saladaǵy jurtshylyq qyzyǵýshylyǵyna erekshe ıe bolǵan oqıǵa sanalady. Tórt aıdan sál ǵana astam ýaqyt ishinde kórmeni 4,5 mıllıonnan astam adam tamashalaǵan. Keıbir kúnderi kórmege kelýshiler sany 70 myń adamnan asyp ketken.
Milan EXPO-2015 dúnıejúzilik kórmesinde túrik eli Túrkııa Respýblıkasy ekonomıka mınıstrliginiń qoldaýymen «Keleshektiń irgesin berik qalaý úshin ótkendi zertteý» tujyrymdamasyna qatysty.
Astanada ótetin kórmedegi Túrkııanyń taqyryptyq tujyrymdamasy «Turaqty energetıka jolyndaǵy Ǵalamdyq ózara árekettestik» dep atalady. Ekspozısııa devızi «Túrkııa – Energııa ortalyǵy» dúnıejúzilik qoǵamdastyqqa Túrkııanyń bolashaqqa senimmen qaraıtyn beıbit súıgish el ekenin pash etedi.
Logotıp kompozısııasynyń negizi – Kún. Oǵyz taıpalarynyń tańbasy da jaratylys kindigi retinde Kúndi erekshe áspetteıdi.
Anadoly kúni – kúnbaǵys. Kók tósindegi altyn kúnge uqsaıtyn bul ósimdik taza energııa sımvoly bolyp sanalady. Logotıpte Túrkııany beıneleıtin osy nyshandardyń bári kórinis tapqan.
Negizgi reńk retinde Túrkııanyń taǵy bir ajyramas sımvoly – kógildir aq túsi tańdap alynǵan.
Tusaýkeser qonaqtary aldynda ataqty «Chellıstambýl» vıolonchelshiler kvarteti óner kórsetip, túrik halqynyń «Sema» jáne «Neı» bıleri oryndaldy.
Baýyrjan MUQANULY, «Egemen Qazaqstan»